“Эргэх холбоо-63” иргэдээ сонсох уулзалт өндөрлөлөө
2023.02.13

“Эргэх холбоо-63” иргэдээ сонсох уулзалт өндөрлөлөө

УИХ-ын гишүүн Ц.Идэрбат 2022 оны намрын чуулган завсарласантай холбогдуулан 2023.01.23-ны өдрөөс Хэнтий аймагт ажиллалаа. Ингээд “Эргэх холбоо-63” хөтөлбөрийн хүрээнд 17 сум, суурин, төрийн 45 байгууллагын нийт 5952 хүнтэй уулзаж, тэднийг сонслоо.

Тэрээр УИХ-ын гишүүдээ төлөөлөн “Эргэх холбоо-63” иргэдээ сонсох уулзалтыг зохион байгуулж аймгийн төвийн 45 байгууллага, Хэрлэн сумын төвийн 6 баг, 5 сургууль, 15 сум, хоёр тосгоны (Өлзийт, Гурванбаян тосгон, Өмнөдэлгэр, Баянхутаг, Галшар, Бор-Өндөр, Дархан, Баянмөнх, Мөрөн, Батширээт, Биндэр, Баян-Адарга, Дадал, Норовлин, Баян-Овоо, Батноров сумд, Бэрх тосгон) нийт 5952 хүнтэй уулзалт хийж, тэдний төлөөлөл 348 хүний давхардсан тоогоор 970 гаруй асуултад хариулж, иргэд, төрийн албан хаагчид, сумдаас уламжилсан санал хүсэлтийг хүлээн авсан юм.

Түүний хувьд өнгөрсөн жил аймгийнхаа 89 багт ажиллаж иргэдээ сонссон бол энэ удаа сумдад, аймгийн төвийн агентлаг хэлтэс, төрийн албан хаагчид, иргэдтэй уулзаж, УИХ-аар баталсан хууль, Засгийн газрын шийдвэр анхан дунд шатанд, иргэдийн амьдралд хэр нийцэж байгааг судалсан уулзалтуудыг зохион байгууллаа. “Эргэх холбоо-52” буюу өнгөрсөн жилийн уулзалтын үр дүн, санал хүсэлтийн хариу, шийдвэрийг мөн хэлэлцүүлэв.

Үүнчлэн УИХ-ын гишүүн, Засгийн газрын гишүүн, Эрүүл мэндийн сайд С.Чинзоригийн орон нутаг дахь анхны томилолт, ажлыг Хэнтий аймагт зохион байгуулж Эрүүл мэндийн салбарын 300 шахам ажиллагсадтай уулзсан уулзалт амжилттай болж, эмч нар салбарын сайддаа 50 гаруй санал, хүсэлт уламжилсан.

2023.02.01-ний өдөр Газрын багц хууль болон Геодези, зураг зүйн хууль, Хот байгуулалтын тухай хуулийн шинэчилсэн найруулгын төслийн нээлттэй хэлэлцүүлгийг Хэнтий аймагт зохион байгуулж, 18 сумын төлөөлөл 262 хүн, 15 байгууллагын 46 төрийн албан хаагч, Чингис хотын 48 иргэн, цахимаар 36, нийт 422 хүн оролцож, хуулийн төсөлд 112 хүн  саналаа хүргэлээ.

Түүнчлэн тойргийн гишүүдийн хүсэлтээр Өвөлжилт хүндэрсэн сумдад МУ-ын Шадар сайд С.Амарсайхан, ХХААХҮ-ийн сайд Х.Болорчулуун нар ажиллаж, 220 тн хивэг, тэжээл, долооцыг 50 хувийн хөнгөлөлттэй үнээр олгохоор шийдвэрийг гаргаад байна.

Тэрээр "Уулзалт хэлэлцүүлгийг зохион байгуулахад туслалцаа үзүүлж, хамтран ажилласан аймгийн ИТХ-ын дарга Г.Хэрлэнчулуун, Засаг дарга Ц.Чогсомжав, ХХААХҮ-ийн дэд сайд М.Ганхүлэг, зөвлөх Ш.Шижир-Эрдэнэ, аймгийн Засаг даргын орлогч Л.Батсайхан, ЗДТГ-ын дарга Ж.Ганбаатар болон төрийн байгууллага, сумдын удирдлагуудад талархал илэрхийлье".

“Эргэх холбоо-63” уулзалтад хүрэлцэн ирж, цаг үеийн мэдээлэл сонсож, үзэл бодлоо илэрхийлж үнэтэй саналаа нэмэрлэсэн иргэддээ гялайлаа" хэмээсэн.

Мөн XVII жарны “Үзэсгэлэн болгогч” хэмээх харагчин туулай жилийн сар шинийн баяр удахгүй болохтой холбогдуулан ажил, уулзалтаа түр хойшлуулж, Туулай жилдээ үргэлжлүүлэн Хэрлэн, Тахилгат, Жаргалтхаан, Цэнхэрмандал, Дэлгэрхаан, Хэрлэнбаян-Улааны уулзалтаа зохион байгуулахаар төлөвлөжээ.