Монгол Улсын анхны орон нутгийн бонд буюу Улаанбаатар хотын бонд гарах нөхцөл бүрдлээ. Нийслэл хотод тулгамдаж буй олон асуудлыг шийдэхийн тулд хотын удирдлагууд зарчмын томоохон шийдлүүдийг хийж байгаагийн нэг ажил нь энэ юм.

УИХ, Засгийн газар ч урьд өмнө нь байгаагүйгээр бодлогын дэмжлэг үзүүлэн ажиллаж байна. Хотоос сонгогдсон УИХ-ын гишүүд хамтран түр хороо байгуулж, Нийслэл Улаанбаатар хотын эрх зүйн байдлын тухай хуулийг 27 жилийн дараа шинэчлэн баталснаар үнэт цаас гаргах нөхцөл бүрдсэн билээ.

Үе үеийн хотын удирдлагуудад урт хугацааны хөгжлийн хөтөлбөрүүдийг санхүүжүүлэх зорилго байсаар ирсэн ч төсвөөс хамааралтай санхүүжилтэд ийм боломж хомс байлаа. Харин бонд гарснаар нийслэлийн төвлөрлийг сааруулж, түгжрэлийг бууруулах, авто зам, замын байгууламжийн сүлжээг өргөтгөх, сургууль, цэцэрлэгийн хүртээмжийг сайжруулах зэрэг стратегийн томоохон ач холбогдолтой төсөл, арга хэмжээг санхүүжүүлэх юм.

Нийслэлд санхүүжилтийн хүндрэлээс шалтгаалан дуусгаж чадаагүй 36 төслийн ажил хурдсах боломтой боллоо

Нийслэлийн Засаг даргын Эдийн засаг, дэд бүтцийн асуудал хариуцсан нэгдүгээр орлогч Ж.Сандагсүрэн:

Нийслэл Улаанбаатар хотын эрх зүйн байдлын тухай хуулийн хүрээнд бонд гаргаж, зах зээлд санал болгоход бэлэн боллоо. Энэ бол нийслэлийн эдийн засагт том эргэлт болно. Хамгийн чухал шийдвэрийг гаргасан Санхүүгийн зохицуулах хороонд нийслэлийн удирдлагууд болон иргэдийнхээ өмнөөс талархал илэрхийлье. Засгийн газраас бондонд 500 тэрбумын дээд хязгаар өгсөн. Бид хэрэгжүүлэх төсөл, хөтөлбөр болоод санхүүжилтээ холбогдох журам, хуулийн дагуу тухай бүр нь тайлагнана. Иргэдийн эрүүл, аюулгүй орчинд амьдрах нөхцөлийг бүрдүүлэх, түгжрэлийг бууруулах, явган зам, дугуйн зам, ногоон байгууламжийг нэмэгдүүлэх, нийгмийн асуудлыг шийдэхэд нийслэлийн үнэт цаас бодит дэмжлэг үзүүлнэ. Дэлхийн олон хот үнэт цаас гаргадаг. Иймээс тулгамдсан асуудалдаа анхаарч, зөв ашиглаж чадвал томоохон үр дүн гарах юм.

Ж.Сандагсүрэн: Улаанбаатар хотын бонд гарснаар нийслэлийн эдийн засагт том эргэлт болно

Ж.Сандагсүрэн: Улаанбаатар хотын бонд гарснаар нийслэлийн эдийн засагт том эргэлт болно