ХХААХҮ-ийн сайд Ж.Энхбаяр Сүхбаатар аймгийн сүүний фермер эрхлэгчдийг өнөөдөр хүлээн авч уулзлаа

НҮБ-ын ХХААБ-ын техник хамтын ажиллагааны “Бэлчээрийн мал аж ахуйд суурилсан амьжиргааны эмзэг байдлыг бууруулж цаашид тохиолдож болзошгүй гамшгийг сөрөн тэсвэрлэх чадвартай болгоход дэмжлэг үзүүлэх” төслийн хүрээнд Сүхбаатар аймгийн Баруун-Урт суманд сүүний үхрийн эрчимжсэн аж ахуй эрхэлж байгаа есөн хоршоо нэгдсэн зохион байгуулалтад орж, “Мандах наран сүүн далай” дундын хоршоог байгуулсан байна.

Тус дундын хоршооны төлөөлөл 20 гаруй малчин Төвийн бүсэд сүүний үхрийн эрчимжсэн аж ахуй эрхлэгчдээс туршлага судлах аялал хийж байгаа юм. Тэднийг ХХААХҮ-ийн сайд Ж.Энхбаяр Дархан-Уул аймаг дахь ХХААХҮЯ-ны байранд хүлээн авч уулзаж, үхрийн эрчимжсэн аж ахуйн чиглэлээр хэрэгжүүлж буй бодлогоо танилцуулан, санал солилцов.

Сайд Ж.Энхбаяр уулзалтад оролцогчдод сүүний үхрийн аж ахуйг эрхлэхэд нэгдүгээрт, үхрийнхээ тэжээлийг шийдвэрлэх, хоёрдугаарт, одоо маллаж байгаа төрөл бүрийн сүүний үүлдрийн үхрээ төрөлжүүлж, нэг үүлдрийн үхэртэй болох нь чухал гэдгийг зөвлөсөн юм. Сүүний үхрийн үүлдэрлэг байдлаа сайжруулах, үржлийн ажилд мэргэжлийн байгууллага, мэргэжлийн арга зүйгээр хангахаа илэрхийллээ.

Сүхбаатар аймгийн удирдлагууд орон нутгийнхаа сүүний хэрэгцээг бүрэн хангах хүрээнд Малын тэжээлийн таримал ургамал тариалах 1000 га талбайн асуудлыг аймгийн ИТХ нь шийдвэрлэж, Засаг дарга албан бичгээр Засгийн газарт хүсэлтээ ирүүлбэл газрын асуудлыг дэмжин хамтран ажиллах бүрэн боломжтойг онцоллоо.