УИХ-ын дарга Д.Амарбаясгалан Увс аймгийн Өмнөговь сумын иргэдтэй өнөөдөр уулзлаа.

Тус сумын ЕБС 1983 онд ашиглалтад орсон, сурагчид 3 ээлжээр хичээллэдэг, анги танхим, заалны хүрэлцээгүйн улмаас зарим хичээлийг түрээсийн байранд явуулж буй талаар хэллээ. Мөн уурын зуух хүчин чадлаа дийлэхээ больсон, дотуур байр дулаан алдагдалтай хүүхдүүд хүнд нөхцөлд суралцаж буй талаар хэлж байна.

УИХ-ын дарга Д.Амарбаясгалан хэлэхдээ “Хот, хөдөөгийн боловсролын ялгааг арилгах хамгийн чухал учраас Өмнөговь суманд 640 хүүхдийн сургуулийн жишиг зургийг гаргаж, ирэх жилийн төсвийн хөрөнгө оруулалтад багтаахаар хичээн ажиллах болно.2025 оны улсын төсөвт тус сумын дотуур байр, спорт заалны барилгын ажлын хөрөнгө оруулалтын тодорхой хэсгийг тусгаад байна” гэсэн юм.

Түүнчлэн иргэдийн зүгээс эрчим хүчний хөнгөлөлт, шөнийн тарифын чөлөөлөлт зэргийг хязгаар нутагт явуулж болох эсэх талаар санал хэлж байна. Юун түрүүнд, баруун бүс нутгийг эрчим хүчний төвлөрсөн төв болгох зорилгын хүрээнд Эрдэнэбүрэн УЦС-ыг ашиглалтад оруулснаар баруун 5 аймаг хэрэглээнээс гадна үйлдвэрлэл эрхлэх эрчим хүчний тасралтгүй, найдвартай эх үүсвэртэй болно. Мөн сэргээгдэх эрчим хүчний төслүүд хэрэгжиж эхэлнэ. Ингэснээр эрчим хүчний хөрөнгө оруулалтууд баруун бүс рүү чиглэж, төвлөрсөн төв болгох зорилго хангагдах боломж бүрдэх юм.