УИХ-ын чуулганы өнөөдрийн /2025.05.08/-ны хуралдаанаар Монгол Улсын Үндсэн хуулийн цэцийн 2025 оны 04 дүгээр дүгнэлт /Монгол Улсын Их Хурлын сонгуулийн тухай хуулийн 72 дугаар зүйлийн 72.1 дэх хэсгийн холбогдох заалт Монгол Улсын Үндсэн хуулийг зөрчсөн эсэх/-ийг хэлэлцлээ.

Хэлэлцэж буй асуудалтай холбогдуулан гишүүд нэр дэвшигчид хандан үг хэллээ.

УИХ-ын гишүүн А.Ганбаатар:

Цэцийн дүгнэлтийг дэмжиж байна. Үндсэн хуулийн цэц бол Үндсэн хуулийн манаач. ҮХЦ-ээс орж ирж буй зарим асуудлыг хүлээж авахгүй байгаа нь харагддаг. Энэ нь олон нийтэд хуулийн зөрчил харагдаж байгаа мэт харагдаад байгаа юм. Үндсэн хуулийн цэцийн хувьд энгийн үгээр зүйрлэн хэлбэл "Түүнээс дээш тэнгэр л бий" гэж ярьдаг. Цэцийнхээ дүгнэлтэд үндэслэлтэй, суурьтай хандаж баймаар байна. Саяын үндэслэлүүд үнэхээр сонгох, сонгогдох эрхэнд тулгуурласан зөв шийдвэр гаргасан байна. Хууль зүйн байнгын хороо яагаад энэ дүгнэлтийг хүлээж авахгүй гэв? Дарга, гишүүдээс нь асуумаар байна. Цагаан хуудас, цагаан сонголтыг бид өгдөг шүү дээ. Аль ч хүнийг нь дэмжихгүй байна гээд. Яагаад үүнийг та бүхэн дэмжихгүй байгаа юм? Хэнийг ч сонгохгүй байх эрхийг нь хаагаад байна шүү дээ. Сонгох эрхийг нь боомилж байна. Дээр нь гуя дагаж хүзүү орж ирдгийг хааж байгаа. 2 том нам 9 хүнтэй тойрогт багаар нь дэмжээрэй гээд багцлаад явдаг. Ард нь санхүүгийн асуудал яригддаг. Энэ чинь сонгуулийг шударга бус болгож байна. Жижиг нам, бие даагч нарт орон зайг нь хааж байна. ХЗБХ өөрөө ҮХЦ-ийнхээ дүгнэлтийг хаасан шийдвэрийг УИХ руу оруулж ирэх юм. Гишүүдийг эвгүй байдалд оруулж, цэцтэй маргалдах сэжүүр гаргаад байна. Гишүүд зоригтой байж, намын бодлогоосоо нэг удаа ухраад сонгох сонгогдох эрхийг хүндлэх шийдвэр гаргахыг уриалж байна. Сонгох сонгохгүй нь та бүхний үйл ажиллагаанаас хамаарна. 4 жил юу хийсэн бэ гээд.

Сэтгүүлч

. Б.Цэцэгсүрэн