Дэмбэрэл.С 2014.03.25

Бүх яамны чиг үүрэгт агаарын бохирдлын эсрэг үйл ажиллагаа хэрэгжүүлэх асуудлыг хуульчилна

Бүх яамны чиг үүрэгт агаарын бохирдлын эсрэг үйл ажиллагаа хэрэгжүүлэх асуудлыг хуульчилна
Төслийг өргөн барив

Улсын Их Хурлын гишүүн С.Дэмбэрэл, А.Бакей, Сү.Батболд нар Монгол Улсын Засгийн газрын тухай хуульд нэмэлт оруулах тухай хуулийн төслийг өнөөдөр /2014.03.25/ Улсын Их Хурлын дарга З.Энхболдод өргөн барилаа.

Монгол Улсын Засгийн газрын тухай хуулийн 20 дугаар зүйлийн 5 дахь хэсгийн 1-18 дахь заалтад нэмэлт оруулах замаар бүх яамны чиг үүрэгт нь үйл ажиллагааныхаа хүрээнд агаарын бохирдлын эсрэг үйл ажиллагаа хэрэгжүүлэх асуудлыг хуульчлан тогтоохоор хуулийн төсөлд тусгажээ. Төр, иргэд, аж ахуйн нэгж байгууллагуудын агаарын бохирдлыг бууруулах хамтарсан хүчин чармайлт, үйл ажиллагааг илүү үр дүнтэй болгох зорилгоор дээрх хуулийн төслийг санаачилсан байна. Хуулийн төсөл батлагдсанаар агаарын бохирдлыг эсрэг нэгдмэл үйл ажиллагааны эрх зүйн үндэс бий болно хэмээн хуулийн төсөл санаачлагчид үзжээ.

Тухайлбал, Гадаад харилцааны яамны хувьд бүх ЭСЯ-дууд агаарын бохирдлын эсрэг сайн туршлага, ногоон технологийг судалж, “Ногоон дипломат” үйл ажиллагаа идэвхжсэнээр олон улсын байгууллагууд, гадаадын холбогдох яамдтай энэ чиглэлийн хамтын ажиллагаа өргөжиж, гадаадад суугаа монголчуудыг энэ үйл ажиллагаанд татан оролцуулах боломж нээгдэнэ хэмээн хуулийн төслийн танилцуулгад дурдсан байна. Энэ мэтээр яамд эрхлэх асуудлынхаа хүрээнд олон талын үйл ажиллагааг санаачлан хэрэгжүүлэх боломжтой болж, агаарын бохирдлын эсрэг төр, хувийн хэвшил, иргэдийн үр дүнтэй хамтын ажиллагааны механизм бүрдэнэ гэж төсөл санаачлагчид үзэж байгаа юм байна..