Оюунхорол.Д 2019.10.02 | Vip76.mn

Д.Оюунхорол: Эмнэлэг сургуулийн тендерийн ажилд анхаарч өгөөч

Улсын Их Хурлын Төсвийн байнгын хорооны өнөөдрийн (2019.10.02) хуралдаан гишүүдийн 52,6 хувийн ирцтэй эхэлж, Монгол Улсын 2018 оны нэгдсэн төсвийн гүйцэтгэл, Засгийн газрын санхүүгийн нэгтгэсэн тайлан, “Монгол Улсын 2018 оны төсвийн гүйцэтгэлийг батлах тухай” Улсын Их Хурлын тогтоолын төслийн хоёр дахь хэлэлцүүлгийг хийлээ. Хуралдааныг Улсын Их Хурлын гишүүн Н.Амарзаяа даргалав. 

Монгол Улсын 2018 оны нэгдсэн төсвийн гүйцэтгэл, Засгийн газрын санхүүгийн нэгтгэсэн тайлангийн талаар Засгийн газрын гишүүн, Сангийн сайд Ч.Хүрэлбаатар, Төсвийн байнгын хорооны харьяа төсвийн ерөнхийлөн захирагчийн эрхлэх асуудлын хүрээний байгууллагуудын санхүүгийн нэгтгэсэн тайлан, төсвийн гүйцэтгэлд хийсэн аудитын дүгнэлтийн талаар Монгол Улсын Ерөнхий аудитор Д.Занданбат  нар тус тус танилцуулав.

Энэ үеэр УИХ-ын гишүүн Д.Оюунхорол

Хэлэлцэж байгаа асуудлыг дэмжиж байна. Тодруулах хоёр зүйл байна. Боловсрол эрүүл мэндийн салбарын хөрөнгө оруулалтууд батлагдчихаад газар чөлөөлөх асуудлаас болоод хийгдэж чадахгүй байгаад байна.

Нийслэлийн засаг дарга М.Амарсайхантай яриад Нийслэлийн БЗД-ын 2-р хороонд 960 хүүхдийн сургууль цэцэрлэгийн комплекс барих хөрөнгө оруулалтын газрын асуудал шийдэгдэхээр болсон. 38 айлын газар чөлөөлөгдчихөөд байгаа одоо дахиад хэдхэн айлын газар шийдэгдчихвэл болох гээд байгаа юм. Цаг хугацаа яваад хөрөнгө оруулалт татагдчих вий гэсэн болгоомжлол байгаа учраас үүнийг урьдчилсан байдлаар тендерийн сонгон шалгаруулалт зарлаад хамгаалалтад аваад өгөх боломж байна уу?

БЗД-ийн 21-р хороонд баригдах 50 ортой эмнэлгийн барилгын газрын асуудал шийдэгдсэн тендер нь жаахан удаашралтай зохион байгуулагдаж  байгаа энэ тендерийн ажилд онцгой анхаарч өгөөч.