Чинзориг.С 2020.02.14 | Zindaa.mn

C.Чинзориг: Тухайн үед "Капитал" банк гэрээний заалтаа биелүүлээгүй

C.Чинзориг: Тухайн үед "Капитал" банк гэрээний заалтаа биелүүлээгүй

Ерөнхийлөгчийн Тамгын газрын дарга З.Энхболд өчигдөр /2020.02.13/ өөрийн хүсэлтээр ажлаа хүлээлгэж өгч байгаа талаараа мэдээлэл хийсэн билээ.

Тэрбээр энэ үеэрээ "Капитал банканд байршуулсан Нийгмийн даатгалын сангийн мөнгийг татаж аваагүй нь С.Чинзориг сайдын алдаа" гэж хэлсэн юм.

Энэ асуудалд Хөдөлмөр, нийгмийн хамгааллын сайд С.Чинзориг тайлбар өглөө.

Тэрбээр "2008-2012 онд Нийгмийн даатгалын чөлөөт үлдэгдлийг арилжааны банкуудад байрлуулсны хүүгээр 47-хон тэрбум төгрөг олж байсан. 2012-2016 онд 260-аад тэрбум төгрөгийн орлого олдог болсон. Орлого ингэтлээ өссөн байхад тэр үеийн удирдлагуудыг буруутгалаа гэсэн юм ярьсан. 2008 оны үед арилжааны банкуудад мөнгө байршуулах нь эрсдэлтэй гэж үздэг байсан. Нийгмийн даатгалын сан хүүгийн орлого олно гэхээсээ өмнө эрсдэлгүй байх нь чухал. 47 тэрбум байсан хүүгийн орлого 260 болж нэмэгдсэн гэдэг нь тийм ч сайхан юм биш. Нийгмийн даатгалын сангийн мөнгөнөөс арилжааны банкуудад байршуулах мөнгө нь 6 дахин өссөнөөс л болсон хэрэг. Хоёрдугаарт, "Капитал" банкны байдал хэцүүдэж байгааг мэдсээр байж С.Чинзориг Нийгмийн даатгалын сангийн мөнгийг татаж аваагүй гэдэг асуудлыг яриад байгаа. Намайг  сайдаар томилогдож ирэхэд арилжааны банкуудад нийтдээ 570-аад тэрбум төгрөг байршсан байсан. Үүний 31 хувь буюу 238 тэрбум төгрөг нь "Капитал" банканд байсан. Нийгмийн даатгалын сангийн тодорхой журмуудыг зөрчөөд, жижиг банкинд нийт мөнгөний 31 хувийг байршуулсан байсан нь эрсдэлд орох үндсэн нөхцөл болсон" гэв.

Түүнчлэн "З.Энхболд дарга С.Чинзориг сайд гэрээгээр хүлээсэн үүргээ биелүүлээгүй. Үүнээс болж Нийгмийн даатгалын сан эрсдэлд орсон гэж ч ярьсан. Тийм гэрээ байх нь байгаа. Гэрээг биелүүлэх нөхцөлгүй болсон тохиолдолд үл маргах журмаар хөрөнгөө буцааж авна гэсэн заалт бий. Гэрээний зүйл, заалтаа дагаж мөрдөхийг Нийгмийн даатгалын сангаас "Капитал" банканд удаа дараа мэдэгдэж байсан. Гэвч "Капитал" банк гэрээний заалтаа биелүүлээгүй. Монголбанканд ч гэсэн Нийгмийн даатгалын сангийн мөнгийг үл маргах журмаар "Капитал" банкны хөрөнгөнөөс барагдуулж өгөөч гэдэг хүсэлтийг НДЕГ-аас хүргүүлж байсан. Гэвч Монголбанк "Бидэнд энэ асуудалд оролцох эрх байхгүй" гэдэг хариуг өгч байсан юм билээ. Яагаад гэвэл гэрээг Монголбанктай хамааралгүйгээр хийсэн. Гэрээндээ ямар зүйл болбол үл маргах журмаар НДЕГ-ын мөнгийг гаргаж өгнө гэж заасан ч зөвхөн хоёр байгууллагын хооронд байгуулсан гэрээ. Тиймээс Монголбанканд оролцох хуулийн зохицуулалт байхгүй гэсэн. Ингээд л өнөөдрийг хүрч байна" гэх мэдээллийг хэвлэлийнхэнд өгөв.