Нийслэлийн Удирдах ажилтнуудын шуурхай зөвлөгөөн өнөөдөр боллоо. Хотын дарга өмнөх шуурхай зөвлөгөөнөөр есөн чиглэлээр үүрэг даалгавар өгснөөс хэрэгжилт 83.3 хувьтай биелжээ.

Тухайлбал, Барилга байгууламжийн норм, норматив, дүрэм журам болон холбогдох хууль, тогтоомжид өөрчлөлт оруулах саналаа танилцуулахыг үүрэг болгосон. Тэгвэл дээрх асуудлыг Нийслэлийн Засаг даргын зөвлөлийн хуралд танилцуулахад бэлэн болжээ. Мөн Улаанбаатар хотыг нэг төвт хотоос олон төвт хотын тогтолцоонд шилжүүлэх хүрээнд шинээр гурван дэд төв, долоон олон нийтийн төвийг байгуулах зураг төслийн ажлуудыг хийж байна. Улаанбаатар хотын Захирагчийн ажлын алба, Шуурхай удирдлага, зохицуулалтын төвийн ахлах болон диспетчер инженерүүд, гэрэлтүүлгийн хяналтын төрийн бус байгууллагууд зургаан дүүргийн гэрэлтүүлгийн хэвийн ажиллагаанд хяналт тавьж ажиллахад нийт 203 гэрэлтүүлэг асахгүй байгааг илрүүлж, гэрэлтүүлгийн асалтыг 96 хувьтай болгожээ.

3045 ГАРААШ ЧӨЛӨӨЛӨӨД БАЙНА

Гарааш чөлөөлөх ажлуудыг эрчимжүүлж, тохижилтын ажил хийх хүрээнд өнгөрсөн шуурхай зөвлөгөөнөөс хойш буюу 14 хоногийн хугацаанд есөн байршилд 263 гарааш нэмж чөлөөлөв. Ингэснээр нийт 117 байршилд 3045 гарааш чөлөөлж, энэ ажил 62.7 хувийн гүйцэтгэлтэй байна. Хот тохижилтын газар гарааш чөлөөлсөн дөрвөн байршилд тохижилтын ажлыг эхлүүлжээ. Дугуй цагааны тохижилтын ажил эхэлсэн бөгөөд Хотын дарга иргэдийн санал хүсэлтийг харгалзан, жишээ нь замыг хүүхдийн тэрэг явахад тохиромжтой байдлаар тохижуулах хэрэгтэйг хэлж байлаа.

Өвөлжилтийн бэлтгэл ажлын талаар “Таван толгой түлш” ХХК-ийн Борлуулалт, маркетингийн захирал Г.Ундармаа “40 мянган тонн түлш нөөцлөх ажил хийж байна. Гурван шугам ажиллаж, бусад нь засвартай байгаа. 500 хүнтэйгээр үйлдвэр үйл ажиллагаа явуулж байгаа. Засварын ажлууд төлөвлөгөөний дагуу үргэлжилж байна” хэмээн удирдах ажилтнуудад мэдээлэл өгөв.

Горхи, Тэрэлжийн байгалийн цогцолборт газрын нөхцөл байдлын талаар Налайх дүүргийн Засаг дарга Ч.Раднаабазар “Иргэдийг аялж, амьдрахад тав тухтай нөхцөлөөр хангахын тулд, төрийн үйлчилгээ хүргэхийн тулд хашаа, хайсыг буулгах шаардлагатай байна. Түймэр гарах, онцгой байдал үүслээ гэхэд машин явах орц, гарц байхгүй. Холбогдох байгууллагуудаас санал гарч, нэгдсэн төлөвлөгөө гаргана. Өдөрт 5-6 машин яваад ч хогийг ачиж дийлэхгүй байна. Өнгөрсөн долоо хоногт голд боогдсон хоёр дуудлага ирсэн. Иргэдээ аврахын тулд машин гаргахаас аргагүй. Гэтэл Хэмнэлтийн хууль гарчихсан байхад зардлаа хэмнэсэнгүй гэдэг. Иргэдэд ойлгуулахыг хичээдэг ч үл ойшоох хандлага гардаг. Хог хаясан хүнд торгууль тавьж болдоггүй, ямар байгууллага, хэн тавих нь тодорхойгүй. Үүнийг цэгцлэх шаардлага зүй ёсоор тулгарч байна” хэмээлээ.

ХӨРСНИЙ БОХИРДОЛ, ДОРОЙТЛЫГ БУУРУУЛАХ ХЭЛТЭС БАЙГУУЛЛАА

Нийслэлийн Байгаль орчны газарт Хөрсний бохирдол, доройтлыг бууруулах хэлтэс байгуулжээ. Өнгөрсөн жил Гандангийн өрхүүдийн нүхэн жорлонд ашигтай бактери хийсэн нь үр дүнгээ өгсөн. Иймээс энэ жил 52 мянган нүхэн жорлонд ашигтай бактери хийхээр төлөвлөөд байгаагаа тус газрын дарга М.Нямбаяр танилцуулав.

Нийтийн эзэмшлийн гудамж болон гарааш чөлөөлсөн талбайг тохижуулах ажлын явцын талаар Хот тохижилтын газрын дарга Б.Мөнхцэцэг “Нийслэлийн Засаг даргаас 10 захирамж эрх шилжиж ирсэн. Гүйцэтгэл 50 орчим хувьтай байна. Гарааш чөлөөлсөн 70 байршилд зураг хийж байгаа. Үүнээс 47 байршлаас 17 байршилд зогсоол, үлдсэн 30-д зураг хийж, дөрвөн байршилд тохижилтын ажил хийгээд дуусаж байна. 11 байршлын тохижилтын ажил хийхэд бэлэн болж байгаа” хэмээн ярив. Зам, талбайн цэвэрлэгээ, ногоон байгууламжийн усалгаа зэрэг чиг үүргийн ажлууд хэвийн үргэлжилж байгаа аж. Мөн барилгын материалын үнэ өсөж байгаатай холбоотойгоор аж ахуйн нэгжүүдэд хүндрэл үүсэж байгааг хэлж байлаа. Хотын дарга дүүргийн Засаг дарга нарыг энэ ажилд уялдаатай, хамтран ажиллах хэрэгтэйг сануулж байв.

ЕСӨН БАЙРШИЛД ҮЕРИЙН ДАЛАН СУВАГ ШИНЭЧИЛЖ БАЙНА

Үерийн далан суваг, ус зайлуулах шугам сүлжээний цэвэрлэгээ, үерийн далан сувгийг зориулалтын бусаар өөрчилсөн зөрчлийг арилгуулах, үер усны аюулаас урьдчилан сэргийлэх ажлуудын талаар Геодези, усны барилга, байгууламжийн газрын дарга Л.Ариунтуяа танилцуулав. Тэрбээр “Манайх авто замын борооны ус зайлуулах 163 км шугамыг бүрэн цэвэрлэсэн. Бороо орсны дараах давтан цэвэрлэгээ үргэлжилж байна. Есөн байршилд үерийн далан сувгийн шинэчлэлийн ажил хийж байна. Мөн арматур, бетон, цементийн үнийн өсөлт ажилд шууд нөлөө үзүүлж байгаа” хэмээлээ. Хотын дарга үнийн өсөлтийн талаар тооцоо, судалгаа хийж, танилцуулахыг үүрэг болгов.

ГАЛ ТҮЙМЭР, ГАМШГИЙН ТОО 30 ХУВИАР ӨСЖЭЭ

Өнгөрсөн 14 хоногийн нөхцөл байдлын талаар Нийслэлийн Онцгой байдлын газрын дарга, хурандаа Л.Дашням “Өнгөрсөн онтой харьцуулахад, гал түймэр, гамшгийн тоо 30 хувиар өссөн үзүүлэлттэй байна. Зургадугаар сарын 18-нд орсон борооны улмаас үерийн 85 дуудлага бүртгэгдсэн. Аврах ангиуд найман гэр, долоон байшин усанд автсан, хоёр гэр, мөн таван байшингийн дээвэр нурсныг мэргэжлийн байгууллагатай хамтарч, арга хэмжээ авч ажилласан. Завьт эргүүлээр холбогдох байгууллагын 182 албан хаагч 30 машин, 20 завьтайгаар үүрэг гүйцэтгэн ажиллаж байна” гэв. Энэ хүрээнд гол ус даган амарч, зугаалж байгаа 5000 гаруй иргэнд урьдчилан сэргийлэх мэдээ, мэдээлэл хүргэж, 26 хүний амь аварчээ. Он гарснаас хойш таван том хүн, гурван хүүхэд, нийт найман хүн усанд эндэж, амиа алдсан байна.

Хотын дарга аюул ослоос сэргийлж, ажлаа эрчимжүүлэхийг үүрэг болгов. Мөн автобусны парк шинэчлэлийг эрчимжүүлж, хэдий олон саад бэрхшээл тулгарч байгаа ч хугацаанд нь автобуснуудыг оруулж ирэхэд анхаарахыг санууллаа.

БАРИЛГЫН АЮУЛ, ОСЛООС УРЬДЧИЛАН СЭРГИЙЛЖ АЖИЛЛАХЫГ ҮҮРЭГ БОЛГОЛОО

Шуурхай зөвлөгөөний төгсгөлд Нийслэлийн Засаг дарга бөгөөд Улаанбаатар хотын Захирагч Д.Сумъяабазар дараах үүрэг даалгаврыг өглөө. Тухайлбал, Нийслэлийн 2022-2023 оны өвөлжилтийн бэлтгэл хангах тухай захирамжаар баталсан хийх ажлын жагсаалтыг холбогдох байгууллагууд заалт тус бүрээр хэрэгжүүлж ажиллахыг үүрэг болгов.

Цаг үеийн асуудлын хүрээнд

Нийслэлийн 2022 оны төсвийн өөрчлөлт хийсэнтэй холбогдуулан хөрөнгө оруулалт, төсөл, арга хэмжээний худалдан авах ажиллагааг шуурхай зохион байгуулж, бүтээн байгуулалтын ажлуудыг эрчимжүүлж, хэрэгжилтэд хяналт тавьж ажиллах.
Нийслэлийн “Цахим шилжилт”-ийн нэгдсэн төсөл, арга хэмжээний төлөвлөгөөнд дүүрэг, агентлаг, харьяа байгууллагууд саналаа өгч, тэдгээр саналыг нэгтгэн боловсруулж Нийслэлийн Засаг даргын Зөвлөлийн хуралд танилцуулах.
Нийслэлийн Засаг даргын 2022 оны А/851 дүгээр захирамжаар Хотын стандартыг мөрдүүлэх бэлтгэл хангах арга хэмжээний төлөвлөгөөний дагуу хотын стандартыг мөрдүүлэхэд чиглэсэн сургалт, мэдээллийг олон нийтэд хүргэх ажлуудыг сайтар зохион байгуулж ажиллах.
2023 онд хэрэгжүүлэх төсөл, арга хэмжээний зураг, төсөв, ажлын даалгавар, боловсруулахдаа хотын стандартын хэм хэмжээг тусгах, мөрдүүлж ажиллах.
Барилга угсралтын ажлын явцад гарч болзошгүй аюул, ослоос урьдчилан сэргийлэх, хөдөлмөрийн аюулгүй байдал, барилгын норм, дүрэм, стандартын хэрэгжилтийг сайтар хангуулж, хэрэгжилтэд хяналт тавих ажлаа эрчимжүүлж ажиллах.
Гамшиг ослын болон гол, үер усны аюулаас урьдчилан сэргийлэх, авто замын барилга, байгууламжийн хэвийн үйл ажиллагааг хангах, үерийн далан сувгийн засвар шинэчлэл, цэвэрлэгээний ажлуудаа эрчимжүүлж ажиллах.
Гэр хорооллын айл өрхийн нүхэн жорлон, бохирын цооногт ариутгал халдваргүйтгэл хийх ажлыг зохион байгуулах.
Нийслэлийн хэмжээнд байгаа нийтийн эзэмшлийн гудамж, талбайн тохижилт, цэцэрлэгжүүлэлт, ногоон байгууламжуудын усалгаа, тохижилтод анхаарч хог хаягдалгүй байлгах, цэвэрлэгээний ажлуудаа шуурхай зохион байгуулж ажиллах.

Баяр наадмын бэлтгэл хангах ажлын хүрээнд

Үндэсний их баяр наадмыг зохион байгуулах бэлтгэл ажлыг сайтар хангаж, холбогдох байгууламжуудын засвар үйлчилгээ, стандартын дагуу тохижилтын ажлыг чанартай гүйцэтгэж ажиллах.
Худалдаа үйлчилгээ, хүнсний аюулгүй байдалд хяналт тавьж ажиллах
Хог хаягдалгүй байлгахад анхаарч, цэвэрлэгээний ажлыг сайтар зохион байгуулах
Инженерийн шугам сүлжээний хэвийн, найдвартай ажиллагааг хангаж, ус, цахилгаан хангамжаар байгууллага, иргэдийг тасалдуулахгүй, гэнэтийн гэмтэл, саатал гарахаас урьдчилан сэргийлэх.
Баярын өдрүүдэд нийслэлийн нутгийн захиргааны байгууллагууд хариуцлагатай эргүүл жижүүр ажиллуулах.
Гэмт хэрэг зөрчлөөс урьдчилан сэргийлэх, нийгмийн дэг журам сахиулах /Гаднын орны жуулчдын аюулгүй байдлыг сайтар хангах/
Замын хөдөлгөөний аюулгүй байдлыг сахиулж, хяналт тавьж ажиллах.
Хүүхдүүдийг болзошгүй үер, гол усны осол, эндэгдлээс урьдчилан сэргийлэх, сэрэмжлүүлэх
Нийтийн тээврийн хэрэгслүүдийг батлагдсан чиглэлд түгжрэл сааталгүй явуулахыг тус тус үүрэг болгов.

Автобусны парк шинэчлэлд олон бэрхшээл тулгарч байгаа ч хугацаанд нь оруулж ирэхэд анхаарахыг үүрэг болгов