2022.11.25

БНСУ-ын ‘’СӨҮЛ СҮҮ’’ сүүний үйлдвэрийн үйл ажиллагаатай танилцлаа

Бүгд Найрамдах Солонгос Улсад ажлын айлчлал хийж буй Монгол Улсын Их Хурлын Үйлдвэржилтийн бодлогын байнгын хорооны дарга, гишүүд /202211.22/ БНСУ-ын Хүнс, хөдөө аж ахуйн яамны Мал аж ахуйн менежментийн хэлтсийн дарга Жэй Хван-тай уулзаж, тус улсын сүү, сүүн бүтээгдэхүүний дотоодын хэрэглээний 40 гаруй хувийг хангадаг ‘’СӨҮЛ СҮҮ’’ сүүний үйлдвэрийн үйл ажиллагаатай танилцлаа.

Тус үйлдвэр нь 1793 ажиллагсадтай, 1495 фермерээс /127.0 мянган үхэртэй/ сүүгээ авч, өдөрт 5.5 мянган литр сүү боловсруулан 100 гаруй нэр төрлийн сүүн бүтээгдэхүүн үйлдвэрлэдэг.

Үйлдвэрийн удирдлагууд Засгийн газраас фермерүүдийн үйл ажиллагааг дэмжихэд болон сүүний үхрийн ашиг шимийг нэмэгдүүлэх, сүү, сүүн бүтээгдэхүүний чанарыг сайжруулахад онцгой анхаардаг талаар дурдаж сүү, сүүн бүтээгдэхүүний хадгалалтаас хамааран экспортлох боломж бага, мөн нийт газар нутгийн 70-аад хувь нь өндөр уулархаг байдагтай холбоотойгоор үхрийн тэжээлийг импортоор авдаг нь бүтээгдэхүүний өртөгт нөлөөлдөг талаар дурдаж байлаа.

Бүтээгдэхүүний үнийг тогтоохдоо үндсэн үнэ /тэжээлийн зардал, эм тариа гэх мэт/ бүтээгдэхүүний найрлага /тослог, уураг/, эрүүл ахуйн зэрэглэл /нянгийн эс, бактери/-ийг харгалздаг бөгөөд зах зээлийн эрэлт ч бас хамаарах юм.