Нүүрсний хулгайн асуудлаарх УИХ-ын хяналтын нээлттэй сонсгол энэ сарын 21-ны өдөр болно. Энэ талаар УИХ-ын дэд дарга С.Одонтуяагаас тодрууллаа.

-Нүүрсний хулгайн асуудал өндрөө авч, иргэд жагсагчид хулгайчдын нэрсийг зарлахыг шаардаж байна. Удахгүй болох нээлттэй сонсголын үеэр нүүрсний хулгайчдын нэрсийг зарлаж чадах уу?

-Мэдээж, гүйцэтгэсэн хэдэн хүний нэрийг зарлаад, асуудлыг хаах гэж оролдоно. Гэхдээ цаана нь том акулууд буюу бүх боломжийг олгосон хүмүүс байж байгаа шүү дээ. Энийг зарлаад явна гэвэл бүхий л байгууллага хэцүүдэх байх даа.

–Оффтейк гэрээг яг хэн хийсэн нь ил болох уу. Нүүрсний хулгайн хэрэгт АН-ын гишүүдийн нэрс илүүтэйгээр яригдаж байна?

-Би хяналтын сонсголын гишүүн. Мөн сонсголыг ил тод явуулах, үр ашигтай сонсголыг явуулах ажлын хэсэг гарсан. Тодорхой, тэрний, энэний гэж хэлж чадахгүй. Яагаад гэвэл өчигдөр нээлттэй сонсголын ажлын хэсэг дөрвөн үндсэн агуулгаар хийхээр тохирсон. Үүний нэг нь оффтейк гэрээг ил болгох байгаа. Ер нь Төсвийн тухай хууль дагалдаж орж ирсэн хуульд ил болгохоор батлагдсан. Энэ бүх асуудлыг түр хорооны шугамаар нухацтай ярилцахыг анхаарууллаа. Яагаа ч үгүй түр хорооний гишүүд гарч, олон нийтэд буруу зөрүү тоо ярих, хэн нэгний нэр ус хэлэхгүй байхыг гишүүдэд сануулсан.

-Ерөнхийлөгч асан Х.Баттулга нүүрсний хулгайд холбоотой юу?

-Одоо би хэн холбоотойг хэлж чадахгүй. Энэ сарын 21-нд нээлттэй сонсгол хийнэ. Үүнийг маш үр бүтээлтэй, хэвлэл мэдээллийн оролцоотой хийнэ. Мөн цаг хязгаарлагдмал үед нэг хүн гарч ирчхээд холбогдолгүй юм яриад хүмүүсийг залхаахгүйгээр бид гол дүгнэлтийг оруулж ирэхээр ярьж байна. Энд тэндээс хэчнээн хуудас материал ирж байна. Түүнийг уншиж танилцах ажил их байна. Яг гишүүний хувьд одоо ийм, тийм гэсэн зүйл хэлж чадахгүй. Ер нь иргэд хоол хүнсээ авч чадахгүй байхад эрх мэдэлтнүүд хулгайг яагаад өөгшүүлсэн юм бэ. Энэ хулгайг илрүүлэх таслан зогсоох эрх мэдэл нь Засгийн газарт байсан. Бид бүх эрх мэдлийг өгсөн. Давхар дээлтэй болчихлоо, шаардлагатай төсвийг нь баталчихлаа. Яг юу дутсан юм бэ гэдгийг асуумаар байна. Яагаад эрх баригчид хариуцлагатай хандаагүй вэ?

-УИХ-ын зарим гишүүдээс 40 их наяд нүүрний хулгай гэж яриад байгаа нь хэр үндэслэлтэй вэ?

-Би одоогоор тоо хэлэх боломжгүй. Түр хорооны гишүүдийг буруу зөрүү тоо хэлж, хүмүүсийг янз бүрээр төөрөгдүүлэхгүй байхыг сануулсан. Янз бүрийн тоо эсвэл нэр хэлбэл хүмүүс асахад бэлэн байна. Тиймээс ажлын хэсэг, түр хорооны гишүүний хувьд үүнд нухацтай хандана.

“Нүүрсний хулгайг зогсоох бүх эрх мэдэл Засгийн газарт байсан”