МЭНДЧИЛГЭЭ

2023.12.31

МЭНДЧИЛГЭЭ

Баянгол дүүргийн эрхэм хүндэт иргэд, нийт монгол түмэндээ айлчлан ирж буй шинэ жилийн мэндийг өргөн дэвшүүлж, айл өрх бүрт, хүн бүрт аз жаргал, эрүүл энх, сайн сайхан бүхний дээдийг хүсэн ерөөе.

Та бид улиран одож буй 2023 оны амжилт бүтээл, алдаа оноогоо дүгнэн цэгнэж, угтан айсуй 2024 ондоо ололтоо бататгаж, илүү ихийг хийж бүтээж, хамтдаа нэгэн зүгт зорьж, улс орон, нийслэл, дүүргийнхээ хөгжлийн төлөө мөр зэрэгцэн зүтгэх торгон агшинд ирээд байна.

Баянгол дүүргийн хувьд 2023 он ололт амжилтаар дүүрэн жил болж өнгөрлөө. Тухайлбал, оны эхний 11 сарын байдлаар дүүргийн төсвийн орлогын төлөвлөгөө 107.2 хувийн биелэлттэй, эрүүл мэндийн салбарынхан маань давхардсан тоогоор 899 мянга гаруй иргэнийг амбулаторийн үзлэгт хамруулсан, боловсролын чанар хүртээмж сайжирсан, хөдөлмөр эрхлэлтийг дэмжих үйл ажиллагаанд 3000 орчим иргэнийг хамруулсан, гэмт хэрэг өмнөх оны мөн үеэс 4.5 хувиар буурсан зэргийг дурдаж болно.
Баянгол дүүргийн ИТХ-ын ээлжит хуралдаанаар 2024 оныг “ХҮНИЙ ХӨГЖЛИЙГ ДЭМЖИХ ЖИЛ”-ээр зарласан. Аливаа улс орны хөгжил өнгөрсөн, одоо, ирээдүй гурван цагийн хэлхээсэнд оршдог бөгөөд бодлогын цөм нь Хүн байдаг. Тийм ч учраас бид хүнээ хөгжүүлэхийн төлөө, хүний эрүүл, аюулгүй орчинд амьдрах эрх, эдийн засгийн баталгааг хангахын төлөө зорьж ажилласаар ирсэн.
Боловсрол бол эн тэргүүнд. Миний зүгээс санаачлан боловсролын салбарт хэрэгжүүлсэн зарим ажлаасаа энэ цаг мөчид дурдахыг хүсэж байна. “Багшийн чадварыг бэхжүүлэх” тэтгэлэгт төсөл бол манай дүүргийн багш сурган хүмүүжүүлэгчдийн хүсэн хүлээдэг арга хэмжээ болсон билээ. Төслийн хүрээнд одоогоор 75 багшийг Солонгос, Японд боловсролын салбарын үйл ажиллагаатай танилцуулж, туршлага судлуулсан нь үр өгөөжөө өгч байна.
Бүх спортын суурь гэгдэх тийболын спортыг 2022-2023 оны хичээлийн жилд ерөнхий боловсролын 20 сургууль, 15 цэцэрлэгт нэвтрүүлж, Японд болсон Аварга шалгаруулах тэмцээнд улсын шигшээ багийнхан маань түрүүлж, манай дүүргийн баг тамирчид гуравдугаар байр эзэлж, 2027 онд болох Азийн тийболын аварга шалгаруулах тэмцээнд оролцох эрх авсан амжилт үзүүллээ.
Эрүүл мэндийн салбарт Иргэдийн Төлөөлөгчдийн Хурал, ХБНГУ-ын Бранденбург мужийн Даме-Шпреевалд хотын Шойнефелд дүүргийн хамтын ажиллагааны хүрээнд дүүргийн 20 өрхийн эрүүл мэндийн төвд 14 нэр төрлийн 60 ширхэг оношилгоо, эмчилгээний тоног төхөөрөмжийг гардуулснаар иргэдэд үзүүлэх эмнэлгийн тусламж үйлчилгээний чанар хүртээмжийг дээшлүүлэхэд үнэтэй хувь нэмрээ орууллаа.
Энэ бүх амжилт, ажил үйлс та бидний хамтынх юм. Угтан ирж буй 2024 онд ч хийж бүтээх олон ажил, хэрэгжүүлэх төсөл, хүрэх ололт та биднийг хүлээж байна.

Ингээд айл бүхний гал голомт ашид бадран гийж, хүн бүрийн хүсэл мөрөөдөл биелэн, хүүхэд бүр аз жаргалтай, настан буурлууд минь сэтгэл тэнэгэр, Монгол орон минь дэвжин дээшлэхийн ашдын ерөөлийг шинэ оны мэндтэй хамтатгаж дахин уламжилъя.