УИХ дахь Эдийн засгийн байнгын хорооны 9 гишүүн өнгөрсөн Баасан гарагийн орой чуулганы хуралдааны дараа Оюу толгой руу шууд нисжээ. 

Тодруулбал, УИХ-ын гтшүүд Бямба, Ням гарагт Оюу толгойн ил, далд уурхай, баяжуулах үйлдвэр, Гашуунсухайт - Ганцмод боомтын хил дамнасан төмөр замын төсөл, Эрдэнэс таван толгой, нүүрс угаах үйлдвэр зэрэгтэй танилцжээ.  

Тус байнгын хорооны гишүүн, УИХ-ын гишүүн Б.Мөнхсоёл энэ талаар хэлэхдээ “Миний хувьд Оюу толгойн далд уурхайтай танилцаж амжаагүй явсан тул тэр том бүтээн байгуулалтыг бодитоор харж, том том экскаватор, ачааны машинуудыг бүсгүйчүүд жолоодон эдийн засагт ихээхэн хувь нэмэр оруулахын сацуу өндөр цалинтай ажил хийн амьдрал ахуйгаа хэн нэгнээс үл хамааран өөрсдийнхөөрөө урлаж буйг маш их бахархан ажлаа.

Нийт 270 орчим жолоочийн 120 нь бүсгүйчүүд аж.

Өмнийн говьд том том бүтээн байгуулалт ид өрнөж улс орны эдийн засагт ихээхэн хувь нэмэр оруулж байгааг бид мэдэж буй. Гэхдээ тэнд амьдарч буй иргэдийн асуудлыг мөн цогцоор харж, сургуулийн хүрэлцээ, ажиллагсдын орон байрны асуудал, бусад нийгмийн хэрэгцээ зохих түвшинд биш хэвээр байгааг шийдэх нь зүйд нийцэх юм. 

Гашуунсухайт боомтын ложистик, нүүрсний ачааны тэргүүд явах, байрлах гэх мэт зохион байгуулалтын ажлуудыг сайжруулах хэрэгцээ өндөр хэвээр. Зах зээл, эрэлт, нийлүүлэлт, нээлттэй тендер, нүүрсний борлуулалт ба үнийн уналт гэх мэт олон асуудлаар ярилцлаа. 2022 онд онцгой байдлын үеэр томилогдон ирсэн залуу удирдлагууд нэлээд ажил амжуулсныг олж харлаа. 

Өмнөговь аймгийн Засаг дарга, орлогч дарга, ИХ-ын дарга гээд шижигнэсэн залуус тэнд ажиллаж байгаа нь бидэнд итгэл найдвар төрүүлэв, бахархав” хэмээн өөрийн цахим хуудсандаа нийтэлжээ.