Токио хотын олимпийн наадмын барилга барих ажилд монгол залуус оролцохоор болжээ
2016.05.23

Токио хотын олимпийн наадмын барилга барих ажилд монгол залуус оролцохоор болжээ

Хөдөлмөрийн сайд Г.Баярсайхан энэ сарын 16- 17-ны өдрүүдэд Япон улсад ажлын айлчлал хийлээ.

Айлчлалын үеэр Монгол Улс, Япон улс хоорондын хөдөлмөрийн салбарын хамтын ажиллагаанд хэд хэдэн чухал асуудлыг шийдвэрлэсэн аж. Хоёр улсын хооронд 23 жилийн өмнөөс хэрэгжүүлж эхэлсэн “Ур чадварын дадлагажигч” хөтөлбөрийг нэмэгдүүлэх, дадлагажигчийн тогтолцоог үр дүнтэй ашиглаж, хөтөлбөрийн хүрээнд Япон руу явах залуусын тоог нэмэгдүүлэх зэрэгхэд хэдэн чухал асуудлыг шийдвэрлэж чадсан байна. Мөн Г.Баярсайхан Япон улсын Эрүүл мэнд, хөдөлмөр, нийгмийн халамжийн сайд Я.Шиозаки болон олон улсын сургалтын хамтын ажиллагааны байгууллага (JITCO)-ын ерөнхийлөгчтэй уулзаж хамтын ажиллагааг өргөжүүлэх гэрээ хийсэн байна.

Манай улсаас 1992-2015 онд 4252 иргэн тус улсад дадлагажигчаар ажиллаж байжээ. Харин өнгөрсөн 2015 онд 336 хүн уг хөтөлбөрт хамрагдсан гэнэ. Одоогийн байдлаар Япон улсын томоохон үйлдвэрүүдэд манай улсын 600 гаруй залуус ур чадварын дадлагажигчаар ажиллаж байгаа аж.

Япон улсаас Монгол Улсад суугаа Элчин сайдын яамнаас өнгөрсөн оны гуравдугаар сард Хөдөлмөрийн яаманд 2020 онд Токио хотноо болох олимпийн наадмын барилга байгууламжийн ажилд ажиллах хүч авах тухай саналыг ирүүлсэн байна. Уг бичигт Японы барилгын салбарт манай улсаас ажиллах хүч авах, ялангуяа өмнө нь JITCO байгууллагын “Ур чадварын дадлага эзэмшүүлэх хөтөлбөр”-т хамрагдсан иргэдийг дахин хүлээн авах, шинээр ур чадварын дадлагажигчдыг явуулах асуудалд хоёр тал хамтран ажиллах саналыг тавьсан байна. Үүнийг Хөдөлмөрийн яамнаас дэмжиж ажиллахаар болжээ. Токио хотноо болох олимлийн наадмын барилга байгууламж барих ажиллах хүч аваххөтөлбөрийнхүрээнд Япон улсад гурван жилийн хугацаанд барилгын салбарт дадлагажигчаар ажилласан залуусыг хамруулахаар болсон байна.

Казухиро Сүзүки JITCO байгууллагын хувьд Монгол Улстай сүүлийн 23 жилийн турш амжилттай хамтран ажиллаж байгаа бөгөөд Хөдөлмөрийн сайдын саналыг бүрэн дэмжиж бүх талаар харилцааг өргөжүүлэх боломжтой гэдгээ хэлсэн гэнэ. Харин манай ур чадварын дадлагажигчдын тоог ялангуяа, газар тариалан, мэдээлэл технологи, зам гүүр, барилгын салбарт нэмэгдүүлэх тал дээр анхаарах гэнэ. Мөн Япон улсад ур чадварын дадлагажигчаар ажиллаж, амьдарч буй иргэдийн хөдөлмөрийн нөхцөл, цалин хөлсийг нэмэгдүүлэх, гэр бүлээр нь явуулахаар төлөвлөж байгаа аж.

Гэрээний хугацаанд ажлын байрандаа тогтвортой ажилласан хүнийг эх орондоо хөдөлмөр эрхлэх, жижиг дунд үйлдвэр байгуулах боломжийг бүрдүүлж өгөх санал тавьжээ. Үүнийг Я.Шиозаки сайд хүлээн авч ажиллана гэдгээ мэдэгджээ. Хоёр улсын Засгийн газрын болон төрийн захиргааны төв байгууллагын хооронд ажиллах хүчний гэрээ хэлэлцээр хийх, хамтын ажиллагааг өргөжүүлэх саналыг ойрын хугацаанд ажил хэрэг болгох гэнэ.