Байгаль орчин, хүнс, хөдөө аж ахуйн байнгын хорооны хуралдаанаар Мал, амьтны эрүүл мэндийн тухай хуулийн төсөл болон холбогдох бусад хуулийн төслийн үзэл баримтлалыг хэлэлцэх эсэх асуудлыг хэлэлцлээ.

Хэлэлцүүлгийн үеэр УИХ-ын гишүүн Д.Тэрбишдагва хуулийн төслийг нилээдгүй судалсан, засч сайжруулах олон зүйлс байгаа учраас Засгийн газар төслөө эргүүлэн татаж, салбарын мэргэжилтнүүдийн дунд хэлэлцүүлэг өрнүүлэх горимын саналтай байгаагаа хэлсэн юм.

УИХ-ын гишүүн Д.Тэрбишдагва:

"Горимын саналтай байна. Уг хуулийн төслийн үзэл баримтлалыг өнгөрсөн долоо хоногийн байнгын хорооны хуралдаанаар хэлэлцэх байсан ч ирц бүрдээгүй учраас хуралдаж чадаагүй. Хуулийн төслийн талаар бүлгийн хуралдаанаар ярьсан юм.

Өчигдөр байнгын хорооны даргын өгсөн үүрэг, чиглэлийн дагуу хуулийн төслийг нилээд судалсан л даа. Миний бодлоор уг хуулийн төслийг яг энэ хувилбараар нь хэлэлцвэл хэлэлцүүлгийн явцад маш их засвар орохоор байна.

УИХ-аас ажлын хэсэг байгуулж ажиллалаа гэхэд 40-50 зарчмын зөрүүтэй санал гарах байх. Найруулгын алдаанаас эхлээд зарчмын хэд хэдэн алдаа байна. Тухайлбал, мал эмнэлгийг нэг зөвлөл удирдана гэж хуулийн төсөлд тусгажээ. Тус зөвлөл бүх удирдлагыг гартаа авахаар байна. Малын эмч нарыг салбарын яамнаас томилох бөгөөд хяналтын тогтолцоо бүрхэг байна гэж үзлээ.

Хуулийн төслийг бүлэг, зүйл бүрээр нарийвчлан судлахад, 2, 7, 8, 9,10, 11, 13, 17, 20, 21, 25, 28, 29, 30, 31 гээд хуулийн төслийн бараг зүйл бүрийг засварлах шаардлага байна. Байнгын хорооны дарга Ц.Гарамжав Хүнс, хөдөө аж ахуйн салбарын сайд байсан хүний хувьд хуулийн төслийг судлаад өгөөч гэсэн хүсэлт тавьсны дагуу нилээдгүй цаг зарцууллаа.

П.Сэргэлэн сайд аа! Хуулийн төсөлд маш олон засвар хийх шаардлагатай байна даа. Засгийн газраас өргөн мэдүүлсэн хуулийн төсөл УИХ-аар хэлэлцэх явцдаа олон засвар ордог жишгийн дагуу л явах гээд байна.

УИХ-ын гишүүд Засгийн газарт олон удаа сануулсан. Засгийн газраас нэг хуулийн төсөл оруулаад ирдэг. Түүнийг УИХ засдаг ажилтай боллоо. Ингээд ирэхээр УИХ, Засгийн газрын нэр хүндэд халгаатай байна.

Миний хувьд мал, эмнэлгийн мэргэжилтэй биш ч Хүнс, хөдөө аж ахуйн сайд байсны хувьд маш олон засвар орохоор байна шүү гэдгийг дахин дахин хэлье. Тиймээс Засгийн газар уг хуулийн төслөө эргүүлэн татаж, салбарын мэргэжилтнүүдийн дунд хэлэлцүүлэг өрнүүлж, “шүүсийг нь шахах” хэрэгтэй байна."

Д.Тэрбишдагва: Хуулийн төслийн "шүүсийг шахах" хэрэгтэй байна

Д.Тэрбишдагва: Хуулийн төслийн "шүүсийг шахах" хэрэгтэй байна