2017.01.27

Д.Тэрбишдагва: Хувийн мал эмнэлгүүдийг үзэн ядсан байдлаар хандаж ерөөсөө болохгүй

УИХ-ын нэгдсэн чуулганаар 2016.12.28 Засгийн газрын өргөн мэдүүлсэн Мал, амьтны эрүүл мэндийн тухай хуулийн төсөл болон түүнтэй хамт өргөн мэдүүлсэн холбогдох бусад хуулийн , төслийн үзэл баримтлалыг хэлэлцэх эсэхийг хэлэлцэж байна.

Энэ үеэр УИХ-ын гишүүн Д.Тэрбишдагва хуулийн орж ирж байгаа нь цаг үеэ олж, гэхдээ төслийн хувьд маш их засвартай байна. Ажлын хэсэг байгуулах ёстой гэсэн байр суурь илэрхийлсэн юм.

Д.Тэрбишдагва:

Мал эмнэлэг, малын үржил хоёр өөр юм. Малын эмнэлэг бол нилээд шинжлэх ухаанжсан салбар. Харин мал үржил бол бизнес агуулгатай. Тийм учраас мал эмнэлгийг ингэж тусад нь хууль болгож оруулж ирэх шаардлага байгаа.

Хуулийн төслийн хувьд засвар ихтэй байна. Монгол төрийн мал эмнэлгийн бодлогыг ТББ удирдуулахаар орж ирсэн. Үүнийг засахгүй бол болохгүй. Мөн хяналтын тогтолцоо маш ойлгомжгүй байгаа. Тиймээс төслийг хэлэлцэхийг нь дэмжээд засаж сайжруулах хэрэгтэй.

Хариуцлагыг эзэнжүүлэх маш чухал байна. Ялангуяа хөдөө орон нутгийн удирдлагуудын хариуцлагыг сайжруулах асуудал байна. 

Цаашид хуулийн төслөө нилээд сайн боловсруулж, засаж сайжруулж байж оруулж ирж байхгүй бол УИХ дээр засах нь их төвөгтэй байдаг. Хууль түүхий болчих вий гэж бодож байна.

20 гаруй жил тогтчихсон хувийн эмнэлгүүд  гадна, дотны хөрөнгө оруулалтаар тоног төхөөрөмж авчихсан нилээд бэхэжчихсэн байгаа.

Тиймээс хувийн эмнэлгүүдийг үзэн ядсан байдлаар хандаж ерөөсөө болохгүй. Мал төрийн хамгаалалтанд байна гэдэг утгаараа төр нэгэнт бие болчихсон тогтолцоогоо, хувийн хэвшлээ түшиглэж, дэмжиж, тэднээр ажил хийлгэх ёстой.

Энэ хуулийн төслийг ажлын хэсэг гаргаж, сайтар сайжруулж гаргах хэрэгтэй.