Манай улсад сүүлийн 20 жилийн хугацаанд төрийн захиргаа болон төрийн албаны шинэтгэлийн талаар олсон амжилт, туршлага, сургамжийг нэгтгэн дүгнэж, энэ чиглэлээр цаашид шинэтгэл хийх хэрэгцээ, шаардлагын талаар төр, захиргааны байгууллагын ажилтнууд, эрдэмтэн судлаачдын санал бодлыг сонсох үүднээс УИХ-ын Төрийн байгуулалтын байнгын хороо НҮБ-ын Хөгжлийн хөтөлбөртэй хамтран “Захиргааны шинэтгэл: асуудал ба шийдэл” сэдэвт бага хурлыг өнөөдөр Төрийн ордонд зохион байгуулав.

Төр, засгийн болон судлаачдын хүрээнд захиргааны шинэтгэлийн бодлогын талаар нэгдсэн ойлголт бий болгох, Монгол Улсын төрийн захиргааны болон төрийн албаны тогтолцоонд тулгарч байгаа асуудлуудыг шийдвэрлэх гарц, арга замын талаар онол, практикийн маргаан өрнүүлсний үндсэн дээр боломжит шийдлийг тодорхойлох, шинэтгэлийн бодлогыг цогц стратеги болгон боловсруулж төрийн бодлогод тусгуулах боломж, энэ ажиллагаанд холбогдох байгууллага, хувь хүмүүсийн оролцооны талаар хэлэлцэж шийдвэр гаргах зорилгоор энэхүү бага хурлыг зохион байгуулж байгаа аж.

Бага хуралд УИХ-ын гишүүд, УИХ-ын Тамгын газар, Ерөнхийлөгчийн Тамгын газар, Засгийн газрын Хэрэг эрхлэх газар, Төрийн албаны зөвлөл, Авлигатай тэмцэх газар, салбарын яамд, төрийн удирдлагын чиглэлийн сургалт, судалгааны байгууллагын 100 гаруй төлөөлөгч оролцов.

Төрийн байгуулалтын байнгын хорооны дарга Ж.Сүхбаатар бага хурлыг нээж, хэлсэн үгэндээ өнгөрсөн хугацаанд манай улс улс төр, эдийн засгийн шинэтгэлийн асуудалдаа голлож анхаараад захиргааны шинэтгэлийг орхигдуулж ирсэн, иймээс иргэдэд хүргэх төрийн үйлчилгээг хүртээмжтэй болгох, хүнд суртлыг арилгах, улмаар төрийн чадавхийг бэхжүүлэхийн тулд захиргааны байгууллагын бүх шатанд шинэтгэл хийх шаардлагатай байгаа, өндөр хөгжилтэй орнууд ч улс төрийн шинэтгэлийг захиргааны шинэтгэлтэй хослуулж хэрэгжүүлснээр амжилтад хүрсэн туршлага байдаг, энэ үндсэн дээр санал бодлоо хуваалцахаар энэхүү бага хурлыг зохион байгуулж буйг онцлов.

Бага хурлын үдээс өмнөх хуралдаанд Удирдлагын академийн захирал доктор, профессор Г.Чулуунбаатар “Монгол Улсын засаглалын төлөв байдал, тулгамдсан асуудлууд”, УИХ-ын Төрийн байгуулалтын байнгын хорооны дарга Ж.Сүхбаатар “Захиргааны шинэтгэлийн тойм, сургамж, цаашдын чиг хандлага”, Сангийн яамны хэлтсийн дарга Б.Нямаа “Төсвийн шинэтгэл, хэрэгжилтэд анхаарах зүйлс: Орон нутгийн хариуцлагыг өндөржүүлэх нь”, УИХ-ын гишүүн Су.Батболд “Нутгийн удирдлагын бие даасан байдлыг бэхжүүлэх нь”, НҮБ-ын Хөгжлийн хөтөлбөрийн ажилтан Л.Бархас “Төрийн захиргааны шинэтгэлийн олон улсын туршлага, сургамж” сэдвээр илтгэл тавилаа. Илтгэлүүдтэй холбогдуулж УИХ-ын гишүүн Ө.Энхтүвшин, УИХ-ын даргын зөвлөх Д.Даваасамбуу, Засгийн газрын Хэрэг эрхлэх газрын ахлах референт Э.Сумъяа, М.Сандаг-Очир, МУИС-ийн Хууль зүйн сургуулийн эрдэмтэн нарийн бичгийн дарга П.Одгэрэл нарын зэрэг хүмүүс үг хэлж, санал бодлоо хуваалцав.

Үдээс хойшхи хуралдааныг УИХ-ын гишүүн Р.Амаржаргал удирдаж, Удирдлагын академийн дэд захирал доктор Ш.Батсүх “Төрийн албаны шинэтгэлийн асуудлууд”, “МХЗ-9” төслийн судлаачдын багийн ахлагч П.Доржсүрэн “Мянганы хөгжлийн 9 дэх зорилтын хэрэгжилтийн байдал, судалгааны үр дүн”, Төрийн албаны зөвлөлийн дарга Д.Зүмбэрэллхам “Төрийн албанд мерит зарчмыг төлөвшүүлэх нь”, УИХ-ын гишүүн Х.Тэмүүжин “Нийтийн албанд сонирхлын зөрчлийг зохицуулах нь”, АТГ-ын Судалгаа, шинжилгээний албаны дарга Б.Батзориг “Авлигаас урьдчилан сэргийлэх нь:Засгийн газрын ил тод байдал” сэдвээр илтгэл тавив. Эдгээр илтгэлтэй холбогдуулж Ерөнхий сайдын ахлах зөвлөх Б.Долгор, доктор Б.Дашцэдэн, УИХ-ын гишүүн Р.Амаржаргал нарын зэрэг хүмүүс санал бодлоо хэлэв.

Бага хуралд үг хэлсэн хүмүүс төрийн албаны шинэтгэлийг улам эрчимжүүлж төрийн албыг улс төрөөс ангид байлгах, төрийн албаны шинэтгэлийн тэргүүлэх чиглэлийг нэн түрүүнд тодорхойлж хэрэгжүүлэх, захиргааны байгууллагуудын үйл ажиллагааны нээлттэй, ил тод байдлыг хангах, чиг үүргийн шинжилгээг сайжруулах, орон нутгийн бие даасан байдлыг хангах эрх зүйн орчинг боловсронгуй болгох, захиргааны шинэтгэлийг улс төрийн шинэтгэлтэй хослуулах замаар төрийн чадавхийг бэхжүүлж засаглалын үр нөлөөг сайжруулахын чухлыг онцолж байлаа.

Төрийн байгуулалтын байнгын хорооны дарга Ж.Сүхбаатар бага хурлын ажиллагааг хааж, бага хурлыг хамтран зохион байгуулсан байгууллага, илтгэл тавьсан улстөрчид, эрдэмтэн судлаачид, энэ асуудалд ач холбогдол өгч санал бодлоо хуваалцсан УИХ-ын гишүүд, нийт хүмүүст талархал илэрхийлэв. Монгол Улс өнгөрсөн 20 жилийн хугацаанд ардчилал, зах зээлийн харилцааг гүнгийрүүлэхийн төлөө нийгмийн харилцааны бүхий л салбарт хийсэн томоохон шинэчлэлийн нэг онцлог нь улс төр, эрх зүй, эдийн засаг, оюун санаа, захиргааны шинэтгэлийг зэрэг хэрэгжүүлж ирсэн явдал юм. Гэхдээ захиргааны шинэтгэл нь улс төрийн шинэтгэлээс хоцорсноос эдүгээ тулгамдсан асуудлын нэг болоод байна. Иймээс энэ асуудалд ихээхэн нухацтай хандаж цаашдын бодлого чиглэлийг тодорхойлоход улстөрчид, эрдэмтэн судлаачид, төр захиргааны байгууллагын ажилтнуудын ойлголт, байр суурийг ойртуулж нэгтгэхэд энэ удаагийн бага хурал үр дүнтэй болсныг тэрбээр онцлон тэмдэглэв.

Бага хурлаас зөвлөмж гаргаж, захиргааны шинэтгэлийн чиглэлээр бодлогын шинэ хувилбар гаргаж хэрэгжүүлэх үүднээс тодорхой судалгаа шинжилгээ хийж санал боловсруулах ажлын хэсэг байгуулж ажиллахыг Засгийн газарт санал болгохоор тогтов.

Захиргааны шинэтгэлийн асуудлаар бага хурал зохион байгуулав

Захиргааны шинэтгэлийн асуудлаар бага хурал зохион байгуулав