УИХ-аар өнөөдөр Агаарын бохирдлыг буурулах шийдлийг ярьж, тогтоолын төслийг хэлэлцэж байна. 

Энэ үеэр Монгол улсын Ерөнхийлөгч Х.Баттулга чуулганы хуралдаанд оролцож, байр сууриа илэрхийллээ.

Тэрээр эхэнд нь ийм чухал асуудал хэлэлцэж байхад УИХ-ын хангалттай ирцгүй байгаад харамсаж байгаагаа хэлсэн юм. 

Үргэлжлүүлэн "Жил бүр л бид утааны тухай ярьдаг. 2017 оны 1 сарын 10 -нд ҮАБЗ хуралдаж, Нийслэлийн удирдлага болон холбогдох яамд тодорхой үүрэг чиглэл өгсөн байна.  Харамсалтай нь тэр үүрэг чиглэлээс нэг нь ч биелээгүй байна. Ийм байвал ҮАБЗ гэж байгаад яах юм? Тэд хуралдаж, зөвлөмж гаргаад яах юм? Жилийн өмнө нь гэдэг маань ҮАБЗ-ийн 3 гишүүний 2 нь өнөөдрийнхөөс өөр хүмүүс байсан гэсэн үг. Ийм байхад өнөөдөр энэ зөвлөлийг хуралдуулаад яах юм бэ. Шийдвэр нь хэрэгждэггүй.  

Утаа бол бидэнд тулгамдаад байгаа гай гамшиг болсон. Үүнээс өөр гай гамшиг байхгүй. Үүнийг анх намайг УИХ-ын гишүүн болж байх 2004 онд энэ тухай ярьж л байсан. Өнөөдөр 2018 онд ч ярьж л байна. Хамгийн гол нь үүнийг хийх сэтгэл зүрх алга. Өнөөдөр гэрэл гэгээтэй зүйл алга, ийм байдалтай цааш явах юм бол УИХ-ыг тараахад санаачлагчтай ажиллахаас өөр арга алга" гэсэн юм.

Үргэлжлүүлэн утааг хэрхэн бууруулах өөрийн саналаа хэлсэн юм.