О.Баасанхүү: Ардчилсан намыг бүлэгтэй болгож, ард түмэнтэйгээ нэгдэж, хариуцлага нэхье
2020.04.22

О.Баасанхүү: Ардчилсан намыг бүлэгтэй болгож, ард түмэнтэйгээ нэгдэж, хариуцлага нэхье

УИХ-ын гишүүн О:Баасанхүү АН-ын гишүүнчлэлээ сэргээж, намын батлахаа авлаа.

УИХ-ын гишүүн О.Баасанхүү өнөөдөр /2020.04.22/ Ардчилсан намын гишүүний батлахаа УИХ-ын гишүүн, Ардчилсан намын дарга С.Эрдэнээс гардлаа. Тэрбээр 1994 оны гуравдугаар сарын 7-нд Ардчилсан намын гишүүнээр элсч байжээ.

УИХ-ын гишүүн, Ардчилсан намын дарга С.Эрдэнэ:

Манай нам 200 гаруй мянган гишүүнтэй хүчирхэг улстөрийн хүчин. Бид улс төрийн ээдрээтэй нөхцөл байдал, хэцүү цаг үетэй нүүр тулж байна. Хэт олонхийг бүрдүүлж буй МАН 2016 онд дэвшүүлсэн мөрийн хөтөлбөрөө биелүүлж чадаагүй. Мөн цар тахлын үед эдийн засгийг эрчимжүүлэхээр авч хэрэгжүүлж буй арга хэмжээ нь үр нөлөөгөө өгөхгүй байна. 1994 онд манай намын гишүүн байсан О.Баасанхүү Ардчилсан намын гишүүнээр эргэн ирж, гишүүнчлэлээ сэргээж байгаад талархалтай байна. Түүний хувьд 1994 оны гуравдугаар сард  Ардчилсан намын гишүүнээр элсч байсан.

УИХ-ын гишүүн О.Баасанхүү:

Аливаа ардчиллын бүтээн байгуулалтад 300 жил хангалтгүй. Харин ардчиллыг устгахад гурван өдөр хангалттай гэдэг. Миний бие 1994 онд Ардчилсан намд элсч байсан. Одоогийн эрх  баригчид дөрвөн жилийн хугацаанд өөрсдийгөө өмөөрлөө. Сөрөг хүчнийг байхгүй болгочихож. Тиймээс сөрөг хүчин болох Ардчилсан намыг бүлэгтэй болгож, ард түмэнтэйгээ нэгдэж,  хариуцлага нэхье гэж энэ намд элсэж байна. Ардчилал бол  хүнийг нийгмийн гарал, итгэл үнэмшил, шашин шүтлэгээр нь ялгадаггүй.

Ардчилсан нам болон журмын нөхөд надад  итгэл үзүүлж байгаад талархаж байна. Олон хүний эр зориг, амь, амьдралын үнэ цэнээр Монгол Улсад бий болсон Ардчилалд бодит аюул нүүрлэсэн. Үгээ хэлсэн сэтгүүлчээ зоддог, үнэнийг хэлсэн хэн нэгнийг нийгмээрээ гутаан доромжилж буй энэ нийгэмд эрх, эрх чөлөөнийхөө тэмцэх, тусгаар тогтнолоо баталгаажуулах зайлшгүй шаардлага үүсээд байна. Тиймээс ч иргэдтэйгээ хамтраад эрх баригчдаас хариуцлага нэхнэ.