УИХ-ын чуулганы өнөөдрийн \2022.03.31\ нэгдсэн хуралдаанаар Монгол Улсыг 2021-2025 онд хөгжүүлэх таван жилийн үндсэн чиглэлийн тухайн жилийн гүйцэтгэлийн явц болон Монгол Улсын Засгийн газрын 2020-2024 оны үйл ажиллагааны хөтөлбөрийн 2021 оны хэрэгжилтийг сонсов.

Хэлэлцэж буй асуудалтай холбогдуулан гишүүд асуулт асууж, санал хэллээ.

УИХ-ын гишүүн С.Чинзориг: 

Засгийн Газрын үйл ажиллагааны хөтөлбөртэй холбоотой хэд хэдэн анхаарал хандуулах асуудал байна. Хүн амын орлогыг дэмжих, дундаж давхаргыг дэмжих, нийт хүн амын олонхийг дундаж давхарга болгох асуудлууд, гэр бүлийг хүүхдийн тооноос хамааруулан татварын хөнгөлөлт үзүүлдэг болгоно гэсэн зорилтууд, цалин хөлсийг үе шаттай жил бүр нэмэгдүүлэх зорилтууд, байгалийн баялгаас иргэд тэгш шударга хүртэх боломжийг бүрдүүлэх баялгийн сангийн хууль эрх зүйн орчинг бүрдүүлэх, экспортлогч компаниудыг дэмжих экспортын баталгааны санг бий болгох, 150.000 ажлын байр бий болгох, 150.000 иргэдийг орон сууцаар хангах гэх мэт томоохон зорилтуудын хэрэгжилтийн явц бүрхэг байна Ц.Нямдорж сайдаа. Эдгээр зорилтуудын хэрэгжилтийг ханган биелүүлэх талаар цаашид анхаарч ажилламаар байна.

Хоёрдугаарт Засгийн газраас төрийн албан хаагчдын цалин хөлс, нийгмийн баталгаатай холбоотой асуудалд нэгдсэн нэг бодлого, чиглэлтэй болохгүй бол салбарын сайд болгон цалин хөлсний асуудал ярьж байна. Хөдөлмөр, нийгмийн хамгааллын яам гээд үндсэн чиг үүргийн яам нь байгаа. Цалин хөлс, нийгмийн хамгааллын бодлого барьдаг гол яам огт дуугарахаа байлаа. Үүнээс нь болж салбар бүр өөрсдөө цалин хөлс, нийгмийн хамгааллын асуудлаа ярьдаг нэгдсэн бодлого, зохицуулалтгүй боллоо. Хөдөлмөрийн хуулийн зохицуулалт хэрэгжихгүй байна.

Мөн төрийн үйлчилгээний бага цалинтай албан хаагчдын нэмэгдэл, урамшуулалтай холбоотой асуудал олон сар яригдлаа. Энэ асуудлыг богино хугацаанд шийдэх хэрэгтэй.