УИХ-ын чуулганы /2022,10,21/-ны өдрийн хуралдаанаар Макро эдийн засгийг тогтворжуулах чиглэлээр баримтлах бодлого, экспортын орлогыг нэмэгдүүлэх арга хэмжээний талаарх мэдээллийг сонслоо.

Хэлэлцэж буй асуудалтай холбогдуулан гишүүд асуулт асууж байр сууриа илэрхийллээ.

УИХ-ын гишүүн Т.Энхтүвшин:

Боомтын нэвтрүүлэх чадварыг хурдан хугацаанд сайжруулахад төмөр замын асуудал чухал үүрэгтэй. Зүүнхатавчийн боомтоос Сүхбаатар аймгийн бичигт чиглэсэн нарийн царигт төмөр замыг 5-10 км оруулж ирэх. Мөн Сэхээ боомтод байгаа нарийн царигийн төмөр замыг Шивээхүүрэн боомт руу 5-10 км оруулж ирэх. Ингэснээр экспорт нэмэгдэнэ.

Малын болон хүний гоц халдварт өвчин олон гарч магадгүй шүү. Тиймээс төмөр замуудынхаа гарцыг зөв тодорхойлж, нарийн царигийн төмөр замуудыг яаралтай оруулж ирэх шаардлагатай байна. Энэ нь боомтын нэвтрүүлэх хүчин чадлыг хоёр дахин нэмнэ. Үүн дээр дорвитой арга хэмжээ аваач ээ.

2019 онд Замын-Үүд боомтод нарийн царигт төмөр зам байгаагүй. Бүс нутгийн логистикийн төв гэж, Азийн хөгжлийн банкны санхүүжилтээр хоёр ширхэг нарийн цариг оруулж ирсэн. Энэ нь ковид-19 цар тахлын 2-3 жилийн хугацаанд импортын бараа эргэлтийг таслаагүй шүү дээ. Үр дүн, үр ашгийг нь бид хүртсэн. Тийм учир ухаалаг тээвэр буюу цаана байгаа нарийн царигийг Монгол Улсын хил рүү 5-10 км оруулж ирэх асуудлыг эрчимжүүлэх хэрэгтэй байна.  

Хамгийн хурдан хугацаанд хүчин чадлаа нэмэгдүүлэх шийдэл нь зөвхөн нарийн цариг. Үүн дээр тодорхой хариулж өгнө үү.

Түүнчлэн босоо тэнхлэгийн хувь нийлүүлсэн төмөр замыг хос болгох асуудалд ямар бодлого барьж байна. Техник эдийн засгийн үнэлгээ хийгдсэн зүйл байна уу. Үүнийг хос болгохгүй бол тээврийн үнэ дийлдэх ээ болилоо. Хос болгож чадахгүй бол “H3” гэх хурдны авто замаа яаралтай барих хэрэгтэй шүү дээ. Маш богино хугацаанд зам барих бололцоо байна. Дорноговь аймгийн бүс нутагт 4-5 босоо тэнхлэгийн автозам тавьсан асфальтны үйлдвэрүүдийн хайрга, дайрга бэлэн байна. Яаралтай эхлүүлж чадвал нэг жилийн хугацаанд Налайх хүртэл хатуу хучилттай авто зам барьж дуусгах боломж байна.  

Боомтуудыг олон улсын шинж чанартай боомт болгоход анхаараач ээ. Импортын ачаа орж ирэхгүй байна. Түүнчлэн боомт дээр эрчим хүч, усны асуудал маш хүнд байна.  

Түүний асуултад, Зам, тээвэр хөгжлийн сайд С.Бямбацогт хариуллаа.