УИХ-ын чуулганы /2023,06,22/-ны өдрийн хуралдаанаар Үндсэн хуулийн цэцийн 2023 оны 04 дүгээр дүгнэлтийг хэлэлцлээ.

Хэлэлцсэн асуудалтай холбогдуулан гишүүд асуулт асууж, байр сууриа илэрхийлэв.

УИХ-ын гишүүн Ш.Адьшаа:

Надад асуулт байхгүй. Үг хэлье. Үндсэн хуулийн цэцийн дүгнэлтийг УИХ хэлэлцэж байна. Энэ цэцийн дүгнэлтийг би дэмжиж байгаа. Хуурамч шатахуун, жинхэнэ шатахуун гэж нийгэмд талцал үүсгэсэн асуудлыг гаргаж ирж хэвлэл, мэдээлэл бүх сувгуудаар аймшгийн зүйл Монгол улсад нүүрлэсэн мэтээр ярьж байна. Хуурамч шатахуун гэж хаанаас гарч ирсэн юм? Үүнээс болж хэдэн машин эвдэрсэн бэ гэдэг судалгаа байхгүй.

Оросын зах зээл шатахуун, туслах материалыг Монгол Улсад нийлүүлж байгаа хэдхэн тооны хүмүүс, компаниуд бий. Үүнийг бид 70 жил эдэлж, хэрэглэж ирсэн. Гэтэл 2,3 дахь зах зээлийг оруулж ирье гэхээр яагаад эсэргүүцээд байна вэ? Баруун Европын орнууд түүнчлэн дундад Азийн орнуудад энэ технологийг хэрэглээд, нэвтрүүлээд гаргаад ирлээ. Яагаад нэг орны хараат байдлаас бид гарч болдоггүй юм бэ? Яагаад гурав дахь зах зээл байж болдоггүй юм.

Хуурамч шатахуун гэдэг айдас, хүйдсээр ард түмнийг айлгаж, цаана нь бизнес хийдэг бохир технологио болих хэрэгтэй байна. Үүн дээр бид дүгнэлт хийх хэрэгтэй байна. Монголын Засгийн газар, төрөөс хуурамч шатахууныг тогтоосон нэг ч баримт, бичиг байхгүй. Ам дамжсан үлгэр мэт пи-ар яваад байгаа. Миний бие УИХ-ын гишүүнийхээ хувьд энэ асуудлыг зохицуулахын тулд хуулийн төсөл өргөн барьсан. Их Хурал хэлэлцэхгүй байгаа, хэлэлцэхийг хүсэхгүй байгаа юм. Би ШӨХТГ-т хүсэлт тавьсан. Надад дөрөвдүгээр сарын 10-ны өдөр албан ёсоор хариулт ирүүлсэн. Хуурамч шатахуунтай холбоотой нэг ч гомдол ирээгүй гэсэн хариулт ирсэн. Их Хурлын гишүүд үүнийг надаас аваарай. Хэвлэлийнхэн аваарай.

Засгийн газрын хэрэг эрхлэх газраар дамжуулж төрийн өмчит компаниудын олон техник хэрэгсэл эвдэрсэн гэх асуудлыг ярьдаг. Үүнийг сөхөж ярьснаас хойш олон нэвтрүүлэг хийж, хэлсэн хүн бүхнийг харлуулахыг оролдсон. Энэ асуудлыг ярьсан хүн Ардын баатар, эсвэл ардын дайсан болдог хоёр төгсгөл дээр байна.