УИХ-ын чуулганы /2023,06,29/-ны өдрийн хуралдаанаар Нийтийн албанд нийтийн болон хувийн ашиг сонирхлыг зохицуулах, ашиг сонирхлын зөрчлөөс урьдчилан сэргийлэх тухай хуульд нэмэлт, өөрчлөлт оруулах тухай хуулийн төслийн эцсийн хэлэлцүүлгийг хэлэлцлээ. Хэлэлцэж буй асуудалтай холбогдуулан гишүүд асуулт асуулаа. УИХ-ын гишүүн Ц.Сэргэлэн: Зөрчлийн тухай хуулиар Төрийн албан хаагчид, эрх бүхий албан тушаалтнуудад хориглосон зүйл заалт оруулсан. Энэ нь ямар хуулиар зохицуулагдаж байна, эрүүгийн хариуцлага хүлээх үү? Ашиг, сонирхлын зөрчлийн тухай хууль батлагдаад олон жил боллоо. Үүнийг зөрчөөд хариуцлага хүлээлгэсэн тохиолдол хэр байна. Болохгүй гэх нь зөв гол нь хариуцлагын тогтолцоо зэрэг явах ёстой. Энэ талаар шинэ хуульд чангарч орж ирж байна уу, ялангуяа эрүүгийн хуультай уялдсан уу? Түүний асуултад ажлын хэсгийн гишүүд хариуллаа.
2023-06-29
УИХ-ын чуулганы /2023,06,22/-ны өдрийн хуралдаанаар Нийтийн албанд нийтийн болон хувийн ашиг сонирхлыг зохицуулах, ашиг сонирхлын зөрчлөөс урьдчилан сэргийлэх тухай хуульд нэмэлт, өөрчлөлт оруулах тухай хуулийн нэгтгэсэн төсөл болон хамт өргөн мэдүүлсэн хуулийн төслүүдийн анхны хэлэлцүүлгийг хэлэлцлээ. Хэлэлцсэн асуудалтай холбогдуулан гишүүд асуулт асууж, байр сууриа илэрхийлэв. УИХ-ын гишүүн Б.Баттөмөр: Авлигатай тэмцэх чиглэлээр Нийтийн албанд нийтийн болон хувийн ашиг сонирхлыг зохицуулах ашиг сонирхлын зөрчлөөс урьдчилан сэргийлэх тухай хуульд нэмэлт, өөрчлөлт оруулж байгааг дэмжиж байна. Авлигатай холбоотой, албан тушаалаа ашигладаг, улс төрд нөлөө бүхий хүмүүс өөрсдийн хамаарал бүхий улсуудаараа дамжуулан давуу эрх эдэлдэг байдаг газар авчихсан. Яг энэ чиглэлээр хууль гарахыг дэмжиж байгаа. Тиймээс энэ чиглэлд гарсан статистик судалгаа бий юу? Монгол Улсын Үндсэн хуулийн 14 дүгээр зүйлийн 2 дахь хэсэгт, хүнийг үндэс угсаа, хэл, арьс өнгө, нас хүйс, нийгмийн гарал байдал, хөрөнгө чинээ% эрхэлсэн ажил, албан тушаал, шашин шүтлэг, үзэл бодол, боловсролоор нь ялгаварлан гадуурхаж үл болно. Хүн бүр эрх зүйн этгээд байна гэсэн заалт бий. Тэгэхээр заалтууд хоорондоо хэр нийцэж байна вэ. Ажлын хэсэг дээр ямар өөрчлөлт орсон эсэх мэдээлэл одоогийн байдлаар надад ирээгүй байна. Үндсэн хуульд тусгасан суурь эрхийн заалтуудтай хэрхэн нийцэж байгаа вэ?
2023-06-22
УИХ-ын чуулганы /2023,06,22/-ны өдрийн хуралдаанаар Нийтийн албанд нийтийн болон хувийн ашиг сонирхлыг зохицуулах, ашиг сонирхлын зөрчлөөс урьдчилан сэргийлэх тухай хуульд нэмэлт, өөрчлөлт оруулах тухай хуулийн нэгтгэсэн төсөл болон хамт өргөн мэдүүлсэн хуулийн төслүүдийн анхны хэлэлцүүлгийг хэлэлцлээ. Хэлэлцсэн асуудалтай холбогдуулан гишүүд асуулт асууж, байр сууриа илэрхийлэв. УИХ-ын гишүүн Н.Энхболд: Авлигатай тэмцэхийг дэмжилгүй яахав ээ. Хамаг муу юмны эх үүсвэр үүнд байгааг бүрэн ойлгож буй. Бусад хууль, тогтоомжуудтай нийцүүлэх ялангуяа Үндсэн хуультай нийцүүлэх тухай хэр зэрэг яригдсан бэ? Энэ талаар байнгын хороогоор ярьсан уу? Нөгөө л яс үндэс, хэл ус, нас, хүйсээр ялгарахгүй байх тухай хэр зэрэг ярьсан бэ? Түүний асуултад УИХ-ын гишүүн Ж.Сүхбаатар хариуллаа.
УИХ-ын чуулганы /2023,05,04/-ны өдрийн хуралдаанаар Нийтийн албанд нийтийн болон хувийн ашиг сонирхлыг зохицуулах, ашиг сонирхлын зөрчлөөс урьдчилан сэргийлэх тухай хуулийн төслийг хэлэлцлээ. Хэлэлцэж буй асуудалтай холбогдуулан гишүүд асуулт асуулаа. УИХ-ын гишүүн Ц.Идэрбат: Одоогоос хоёр жилийн өмнө 2021 оны 12-дугаар сарын 06-ны өдөр МАН-ын гучдугаар их хурал хуралдаж, авлигалтай тэмцэх ажлыг эхлүүлнэ гэсэн том мессежийг өгч байсан. Магадгүй тэр үед олон хүн эргэлзэж байсан байх. Өнөөдөр авлигалтай тэмцэх үйл явц, эрх зүйн хүрээнд маш том эргэлтүүд ирж байна гэж харж байна. 30 жил үүнийг ярьсан боловч 30 жил ярьснаас өөр юм хийгээгүй байсан зүйл ажил хэрэг болж байна. Өнгөрсөн оны 12-дугаар сард баталсан Эрүүгийн хуулийн өөрчлөлт нь өөрөө авлигалтай тэмцэх маш том эрх зүй болсон. ЖДҮ-ийн гэмт хэрэгт оролцсон гишүүн хэдэн жилийн ял авлаа. Харин эрүүгийн хуулийн шинэ өөрчлөлтөөр хэрвээ тийм хэрэг хийвэл 12-20 жил гэдэг том зүйл яригдаж байна. Ард түмний дунд ургийн мод, ууж идэж ханадаггүй, сан нээгдэх болгонд ард түмний үс босож байсан шүү дээ. Бүх сангаас улс төрд нөлөө бүхий этгээдүүд, түүний ар гэр, ах дүү, амраг садан, хүүхэд бүгдээрээ шавж олон боломжуудыг үгүй хийсэн юм билээ. Монгол улсын Ерөнхийлөгчийн санаачилсан “Хүнсний хувьсгалыг” таван жил хийхэд 3 сая 300 мянган хүний хүнсийг хангахад 1.8 их наяд төгрөг хэрэгтэй юм байна лээ шүү дээ. Гэтэл Хөгжлийн банкны салаагаар урсгасан мөнгө 1.8 их наяд байх жишээтэй. Энэ их боломжийг ашиг сонирхлоо зохицуулж чадаагүйгээс авсан. Тойрогтоо ард иргэдтэйгээ уулзахад ЖДҮ, Хөгжлийн банк, Нүүрсний хэргээс болж Монгол улсад ирээдүй байна уу гэдэг дээр маш их эргэлзээтэй яаана даа гэсэн байдалтай байсан. Харин эрүүгийн хуулийн өөрчлөлтөөр юм наашаа эргэх гээд байна уу даа гэсэн бодолтой байсан. Эл хуулийг ард түмэндээ танилцуулж, хэлэлцэж байгааг танилцуулсан. Ард иргэдийн зүгээс яаралтай баталж өгөөрэй, дэмжээрэй гэсэн саналыг хэлсэн. Төрд ажиллаж буй хүн болгонд мэдээлэлд ойрхон байх, энэ боломжийг ашиглавал өөрт ашигтай байх явдал өдөр тутам тулгардаг. Үүнийг өөртөө ашиглах уу, ард түмэндээ тэр боломжийг ашиглуулах уу гэдэг сонголт төрийн бүх алба хаагчийн өмнө байдаг. Төрийн албан хаагчийн ёс зүйн тухай хууль үүнд уялдаж байна гэж харж буй.
2023-05-04
УИХ-ын чуулганы /2023,05,04/-ны өдрийн хуралдаанаар Нийтийн албанд нийтийн болон хувийн ашиг сонирхлыг зохицуулах, ашиг сонирхлын зөрчлөөс урьдчилан сэргийлэх тухай хуулийн төслийг хэлэлцлээ. Хэлэлцэж буй асуудалтай холбогдуулан гишүүд асуулт асуулаа. УИХ-ын гишүүн Б.Бат-Эрдэнэ: Дэмжиж баяр хүргэж үг хэлье. Парламентад дараалан таван удаа улиран сонгогдож УИХ-д суусан жилүүддээ хуулийн агуулгад багтаж буй асуудлыг тавьсаар ирсэн. Төсөл, тендерээс ангид байж, төр ард түмний нэр барьж авсан зээл бондоос холуур байж, төрийн албыг төрлийн алба болгодог байдлаас татгалзах тухай ярьж, шаардаж ирсэн. Зарчимтай, жудагтай, авлига ашиг сонирхлоос ангид байх нь Улс орон хөгжиж дэвшихийн баталгаа, төр цэвэр тунгалаг байхын үндэс гэдгийг мэддэг ч төр цэвэр болохыг үзэхгүй нь гэж боддог байв. Монгол Улсын Ерөнхий сайд Л.Оюун-Эрдэнэ энэ асуудлыг шийдвэрлэхийн төлөө хуулийн төсөл санаачлаад ороод ирсэн нь сайшаалтай. Улс төрийн ууган хүчин ингэж байж ёс зүйн өндөрлөг дээр бат зогсож дараагийн асуудлаа ярих нь зүйтэй.
