Энэ сарын 18-20-ны өдрүүдэд БНХАУ-ын нийслэл Бээжин хотноо зохион байгуулагдсан "Хөгжлийн төлөөх аялал жуулчлал" олон улсын анхдугаар чуулга уулзалтад БОНХАЖ-ын сайд Н.Батцэрэг тэргүүтэй төлөөлөгчид оролцсон бөгөөд чуулганыг БНХАУ-ын Аялал жуулчлалын сайд ноен Ли Жин Зао нээсэн.

Ли Жин Зао сайд хэлэхдээ: БНХАУ 05 дугаар сарын 19-ний өдрийг “Хятадын үндэсний аялал жуулчлалын өдөр” болгон зарласан ба ирэх 5 жилд 50 орчим аялал жуулчлалын олон улсын хамтын ажиллагаатай төсөл хөтөлбөр хэрэгжүүлэхээр төлөвлөсөн. Мөн 2020 он гэхэд аялал жуулчлалын салбараас олох орлогоо 890 тэрбум юаньд хүргэж, 12-14 сая ядуу иргэдийг аялал жуулчлалын салбараар дамжуулж ядуурлаас гаргана гэж хэлсэн юм. 2015 онд 120 сая Хятад иргэн гадаад улс орнуудад зорчиж, 684 тэрбум юань буюу 104.5 тэрбум ам.доллар гадагш зарцуулсан ба цаашид 600 сая хүн болж өсөх хандлагатай гэлээ. Дэлхий аялал жуулчлалын байгууллагаас 2017 оныг "Тогтвортой аялал жуулчлалын жил" болгон зарласантай холбогдуулж Ли сайд дэлхийн улс орнуудын хамтын ажиллагааг өргөжүүлж, энхтайваны хөгжил рүү чиглэсэн аялал жуулчлалыг хөгжүүлэхийг уриалсан.

Н.Батцэрэг сайд энэхүү уулзалтад оролцсоноор “Монгол Улсын Тогтвортой хөгжил-2030” төлөвлөгөө болон тогтвортой хөгжлийн зорилтын талаар ДАЖБ-ын Ерөнхий нарийн бичгийн дарга ноён Талеб Рифай, БНХАУ-ын Аялал жуулчлалын сайд ноён Ли Жин Зао болон албаны бусад хүмүүст танилцуулж, санал бодлоо солилцлоо.

Мөн энэ үеэр Н.Батцэрэг сайд ДАЖБ-ын ерөнхий нарийн бичгийн дарга ноён Талеб Рифайтай ирэх 10 дугаар сард Монгол Улсад зохион байгуулахаар төлөвлөж буй "Нүүдэлчдийн аялал жуулчлал" чуулга уулзалтын бэлтгэл ажлын талаар хоёр талт уулзалт хийж амжсан юм.

"Хөгжлийн төлөөх аялал жуулчлал" хэмээх энэхүү уулзалтын хүрээнд “Энхтайван ба аялал жуулчлал, аялал жуулчлалаар дамжуулан ядуурлыг бууруулах, эдийн засгийн өсөлтийг хангах, хүрээлэн буй орчны нөлөөлөл, ажлын байрыг өсгөн нэмэгдүүлэх” зэрэг аялал жуулчлалаар дамжуулан тогтвортой хөгжлийг хангах асуулдуудад чиглэсэн Бээжингийн тунхаг бичгийг гаргасан.

Н.Батцэрэг сайд БНХАУ-д “Хөгжлийн төлөөх аялал жуулчлал” дэлхийн анхдугаар чуулганд оролцлоо