Үндэсний шуудан сонин Сэтгүүлч Б.Цогтбаяр

УИХ-ын хаврын чуулган удахгүй эхэлнэ. Хаврын чуулганаар одоогийн хүчин төгөлдөр үйлчилж буй хэд хэдэн хуулиудыг Үндсэн хуулийн нэмэлт өөрчлөлттэй нийцүүлэх, өөрчлөн батлах шаардлагатай байгаа. Эс бөгөөс шинэ Үндсэн хуулиар Засгийн Газар эрхзүйн чадамжгүй болох асуудал ч яригдаж эхлээд байгаа юм. Уг асуудлаар УИХ-ын гишүүн, Төрийн байгуулалтын байнгын хорооны дарга С.Бямбацогт байр сууриа илэрхийллээ.

Тэрбээр “Өнгөрсөн оны 11-р сард батлагдсан Үндсэн хуулийн өөрчлөлттэй холбоотойгоор УИХ-ын энэ хаврын чуулганаар УИХ-ын тухай хууль, ЗГ-ын тухай хууль, УИХ-ын хуралдааны дэгийн тухай хуулиудыг яаралтай батлах ёстой. Яагаад гэвэл сонгуулиас өмнө энэ хуулиудыг батлаж байж сонгуулийн үр дүнгээр байгуулагдах УИХ, Засгийн Газар эрхзүйн чадамжтай болно. Тэгэхгүй бол УИХ, Засгийн газар үндсэн хууль зөрчсөн үйл ажиллагаа явагдаж эхэлнэ. Тийм учраас нэн тэргүүнд УИХ-ын тухай хууль, Засгийн газрын тухай хууль юм.

Шинэ үндсэн хууль тавдугаар сарын 25-наас үйлчилж эхэлнэ. Үндсэн хуулийн нэмэлт өөрчлөлтийг дагаж мөрдөх журмын тухай хуулийг бид баталсан. Уг хуулийн одоогийн хүчин төгөлдөр үйлчилж буй хуулиудыг үндсэн хуулинд нийцүүлж өөрчлөх хүртэл хуучин хууль үйлчилнэ гэж заасан. Өөрөөр хэлбэл Засгийн Газрын тухай хуулийг энэ хаврын чуулганаар баталсан ч хэрэгжих хугацааг нь тавдугаар сарын 25-наас биш долдугаар сарын 1-нээс гээд заачих юм бол хуучин хуулиараа сонгууль дуустал үйл ажиллагаа явуулаад түүний дараа шинээр байгуулагдах Засгийн Газар шинэ хуулиараа үйл ажиллагаа явуулна. Тийм болохоор энд эрхзүйн зөрчил гарахгүй гэж үзэж байгаа.

УИХ-ын хаврын чуулган дөрөвдүгээр сарын 5-наас хуралдаж эхэлнэ. Энэ удаад 40 орчим хоног л хуралдана. Энэ зургаан долоо хоногийн хугацаанд олон хууль хэлэлцэж амжихгүй учраас нэн яаралтай батлах шаардлагатай буюу УИХ-ын тухай хууль, Засгийн Газрын тухай хуулиудаа яаралтай батлах ёстой гэж үзэж байна” гэлээ.