УИХ-ын чуулганы өнөөдрийн \2022.03.17\ нэгдсэн хуралдаанаар Байгаль орчныг хамгаалах тухай хуульд нэмэлт оруулах тухай хуулийн төсөл болон хамт өргөн мэдүүлсэн Байгаль орчинд нөлөөлөх байдлын үнэлгээний тухай хуульд нэмэлт, өөрчлөлт оруулах тухай хуулийн төслийг /Засгийн газар 2021.11.24-ний өдөр өргөн мэдүүлсэн, хэлэлцэх эсэх/ хэлэлцлээ.

Хуулийн төсөлтэй холбогдуулан УИХ-ын гишүүд асуулт асууж, санал хэллээ.

УИХ-ын гишүүн С.Чинзориг:  Хуульд өөрчлөлт оруулах тухай хуулийн төслийг хэлэлцэх эсэхийг дэмжиж байгаа.

Орон нутгийн удирдлагууд шийдвэр гаргаад тодорхой хэмжээнд нөхөн сэргээлт их хийдэг. Ингэхдээ тэд нөхөн сэргээлт нэрийдлээр байгаль орчныг сэндийчдэг, ухдаг гэсэн гомдол иргэдээс ирдэг. Жилд дунджаар хэчнээн га газарт нөхөн сэргээлт хийдэг талаарх БОАЖ-ын яамны судалгаа байна уу?

Тойрогт ажиллаж байхад сумдын Ус цаг уур орчин шинжилгээний албаны ажилтнуудын цалин, нийгмийн хамгаалал нь бусад төрийн албан хаагчдаас бага байгаа талаар дурдаж байсан. Байр нь стандартын шаардлага хангахгүй, орчин үеийн лаборатори, багаж тоног төхөөрөмжийн хүрэлцээ муутай учраас байгаад байна. Энэ чиглэлд БОАЖ-ын яам цаашид хэрхэн ажиллах вэ? Тус яамнаас салбарын хөрөнгө оруулалт дээрээ онцгой анхаарч ажиллах хэрэгтэй байна.

Өвөрхангай аймгийн Богд суманд уулзалтаар очиход нутгийн иргэд Улаан номонд орсон цоохор ирвэс их болж, хүн амьтан айлгаж байна гэх санал хэлж байсан. Цаашид мал сүргийг болоод цоохор ирвэсийг хамгаалахад танай яам хэрхэн ажиллах вэ?

Түүний асуултад БОАЖ-ын сайд Б.Бат-Эрдэнэ хариуллаа.