УИХ-ын чуулганы /2026.10.29/-ний өдрийн хуралдаанаар Нийгмийн сүлжээнд хүүхдийн оролцоог зохицуулах тухай болон хамт өргөн мэдүүлсэн хуулийн төслүүдийн хэлэлцэх эсэх хэлэлцүүлгийг явууллаа.
Хэлэлцэж буй асуудалтай холбогдуулан гишүүд асуулт асууж, байр сууриа илэрхийллээ.
УИХ-ын гишүүн С.Эрдэнэболд:
Нэгт, Энэ хууль батлагдсан улс орнуудын жишээг харсан. Нэгэнт технологийн хувьд тулаад ирсэн асуудал учраас зохицуулалт шаардлагатай нь үнэн. Үүнийг хүлээн зөвшөөрч байна. Гэхдээ хуулийн зохицуулалт дотор хэтэрхий механик зүйлүүд байна. П.Наранбаяр сайд үүнийг санаачиллаа гээд одоогийн Боловсролын сайдт та 2 урд хойноо ороод, улс төржөөд байдаг. Парламентад олон хууль үндсэн логик нийгэмд хэрэгцээтэй ашигтай байдлаасаа болж биш улс төржилтөө даахгүй унаж байгаа тохиолдол байна. Тийм учраас шинэ хуучин боловсролын сайд нар маш сайн анхаарах ёстой. Улс төрийн мэтгэлцээнээ гаднаа тавьж, улсад хэрэгтэй хуулийн зохицуулалт дээрээ хамтарч ажиллах ёстой.
Цахим технологи талаасаа боломжтой нөгөө талаасаа ёс суртахууны хувьд шаардлагатай ч гэсэн зохицуулалт зохион байгуулалт гэдэг чинь эцэг эх, хүүхэд, боловсролын байгууллагууд эдгээр институцүүд тал талаасаа хууль зүйн орчны эко системийг нь эрвийх дэрвийхээрээ ажиллагааг нь зөв болгох гэж явах ёстой. Монголын хуульчдын холбооноос н.Мөнхбат ерөнхийлөгчийн гарын үсэгтэй бичиг 6 сарын 16-нд ажлын хэсэгт санаачлагчид очсон. Нийгмийн сүлжээнд хүүхдийн оролцоог зохицуулах тухай анхдагч хуулийн төсөл заавал анхдагч хууль байх ёстой юу эсвэл одоо байгаа хууль эрх зүйн түвшиндээ зохицуулагдаад нэмэлт өөрчлөлтийн байдлаар явах боломжгүй байсан уу?
Мөн Монголын өмгөөлөгчдийн холбооны Нийслэлийн зөвлөлийн дарга Б. Солонгын П.Наранбаяр дарга руу, Их Иурлын гишүүнд явуулсан бичиг дотор нийтдээ 6 үндсэн зүйлийг дүгнэлт болгож гаргасан байна. Үүн дээр 16 нас хүрээгүй хүүхдэд нийгмийн сүлжээнд бүртгэл үүсгэхийг хориглоно гэж тусгасан нь хүүхдийн мэдээлэл авах, үзэл бодлоо илэрхийлэх, цахим орчинд оролцох эрхийг бүхэлд нь хязгаарласан шинжтэй байна гэж байгаа. Үүнийг би хойд талынх нь хуулийг, үзэл баримтлалыг нь уншаад механик шинжтэй гэж үзэж байна.
Хоёрт, хувийн мэдээлэл алдагдах, мэдээллийн сан бүрдүүлэх, хяналтгүй боловсруулалт хийх эрсдэл үүсэж болзошгүй гэх асуудлыг тавиад байгаа. Үүн дээр ажлын хэсэг, санаачлагч тодорхой тоо баримт өгөөч. Хандалт хязгаарлах, тархалтыг бууруулах арга хэмжээ авах талаар тусгасан боловч ямар үндэслэл, хугацаа, журмаар хэрэгжүүлэх нь тодорхойгүй байна. Гэх мэт тодорхойгүй зүйлүүд дээр 6 сараас хойш санаачлагч нар хэрхэн ажилласан бэ? Энэ хуулийг батлахгүй бол ямар нийгэм, эдийн засгийн эрсдэл үүсэхийг тодорхой хэлж өгөөч.