-Танай намын гишүүн Ц.Цолмон МАХН-д элслээ. Түүний шийдвэрийг юу гэж үзэж байна. Тэрээр тантай энэ талаар зөвлөж байж ийм шийдвэр гаргасан уу?

-Арваад хоногийн өмнө Цолмон надад “урьд нь би Энхбаяр даргад амалсан байсан юм, би МАХН-д орлоо“ гэж хэлсэн. Шийдвэрээ нэгэнт гаргачихсан хүнд надад зөвлөх юм байгаагүй л дээ. Миний хэлсэн юм бол намынхаа нөхдүүдтэй уулзаж, хэлж ярилцаад үйлдлээ хийгээрэй л гэсэн. Цолмонг МАХН-д хэрэгтэй боловсон хүчин гэж бодож байгаа. Сайн ажиллаарай гэж үдье дээ.

-Сүүлийн үед “Шударга ёс” эвсэл задрах нь гэсэн мэдээлэл нийгэмд тархах боллоо. Энэ тохиолдолд Засгийн газарт МҮАН-аас ажиллаж байгаа гишүүдэд өөрчлөлт оруулах уу?

-"Шударга ёс” эвсэл түүнд оролцогч аль нэг нам эвслээс гарахаа албан ёсоор мэдэгдвэл задрах учиртай юм. Тийм алхам МАХН, МҮАН-ын зүгээс аль аль нь хийгээгүй. Тэгэхээр тийм том шалтгаан одоохондоо алга байна гэсэн үг.

-УИХ-д “Шударга ёс” эвслээс нэг гишүүн орж ирэх ёстой. Ц.Цолмон гишүүн МАХН-д орсноор дараагийн гишүүнийг МҮАН-аас УИХ-д оруулж ирэх боломж бий юү?

-Энэ асуудал удахгүй шийдэгдэнэ байх. Ц.Оюунбаатар орох нь ойлгомжтой. Энэ бол зүгээр л цаг хугацааны асуудал.

-Хэрвээ “Шударга ёс” эвсэл задарч, Засгийн газрын бүтцэд өөрчлөлт орвол та шинээр бүрдэх засагт орж ажиллах боломж байгаа юу?

-Эвсэл задарна гэж муу ёрлох хэрэггүй. Ганц нэг хүний асуудлаас болоод эвсэл задарна гэвэл үгүй биз ээ.

-Орон нутгийн сонгуульд МАХН-тай ямар байдлаар хамтарч оролцохоор төлөвлөж байгаа вэ?

-МҮАН “Шударга ёс” эвсэл байгуулсан гэрээнийхээ заалтын дагуу, АН-тай хамтарсан Засгийн газар байгуулсан гэрээнийхээ дагуу зөвхөн МАХН юмуу, аль эсвэл Засгийн газарт орсон намуудтай эвсэл байгуулж ажиллахыг орон нутагтаа зөвлөж байгаа юм.

-Зарим аймаг, дүүрэгт МҮАН-тай хамтрахгүй гэсэн шийдвэрийг МАХН-ынхан гаргасан байна лээ. Үүнийг та юу гэж үзэж байгаа вэ?

-Энэ бол “Шударга ёс" эвсэл байгуулах гэрээнийхээ заалтаас МАХН санаатай татгалзсан тусгүй явдал боллоо. Нийт тойрогоор авч үзвэл 12 газар МҮАН өгсөн зөвлөмжийн дагуу МАХН-тай аль эсвэл АН-тай хамтрах гэрээний үндсэн дээр сонгуульд орох гэж байна. Эвсэл байгуулж чадаагүй бүх тойргуудад МҮАН нэр дэвшүүлэхгүй байх нь зүйтэй гэж бодож байгаа. Яагаад гэвэл сонгогчидоо хагалахгүй байх нь чухал. Энэ талаар МҮАН шийдвэрээ гаргах болно.

М.Энхсайхан: МАХН гэрээнийхээ заалтаас санаатай татгалзлаа