УИХ-ын Төрийн байгуулалтын байнгын хороо өнөөдөр өнгөрөгч чуулганы хугацаанд хийсэн ажлаа тайлагнасан хэвлэлийн бага хурал хийлээ. Мэдээллийн эхэнд байнгын хорооны дарга А.Бакей байнгын хорооны түвшинд хэлэлцэн баталсан хууль тогтоол болон бусад ажлын талаар танилцуулсан.

Мөн үеэр тэрбээр тус чуулганы хугацаанд хэд хэдэн онцлох хуулийг баталсан гэдгийг онцлоод хуулиудын талаар дэлгэрэнгүй мэдээлэл өглөө. Тухайлбал, Дөрвөн тусдаа байсан сонгуулийн хуулийг нэгтгэж, Сонгуулийн тухай хуулийг баталсан. Ингэснээр төр барих нэгдсэн нэг хуультай болсон. Түүнчлэн Хөгжлийн бодлого төлөвлөлтийн тухай хуулийг баталсан нь сонгуулиас сонгуулийн хооронд тодорхойлдог хөгжлийн бодлого төлөвлөлтийн загварыг халж, үүний оронд 3 үе шат бүхий 2016-2030 он хүртэлх төлвийг бий болголоо.

Ингэснээр сонгуульд оролцох намууд дур мэдэн хаанаас хэзээ санхүүжүүлэх нь тодорхойгүй амлалтууд өгөхөө больж, мөрийн хөтөлбөрөө дээрх хуультайгаа нийцүүлэн боловсруулдаг байх үүрэг хүлээнэ. Үүний зэрэгцээ Ард нийтийн санал асуулгын тухай хуулийг Сонгуулийн тухай хуультайгаа нийцүүлэн баталсан гэх мэдээллийг байнгын хорооны дарга өгсөн юм. Хэвлэлийн бага хуралд УИХ-ын гишүүн С.Батчимэг, С.Дэмбэрэл, Д.Лүндээжанцан нар оролцов.

Намууд сонгуульд оролцохдоо амлалт өгөхгүй