Улсын их хурлын чуулганы өнөөдрийн /2019.10.25/ нэгдсэн хуралдаанаар Нэмэгдсэн өртгийн албан татвараас чөлөөлөх тухай хуулийн төслийг хэлэлцэж дэмжлээ. Хуулийн төсөлд, Газрын тос боловсруулах үйлдвэрийн ажилчдын хотхон барихад шаардагдах бараа, материалыг НӨАТ-аас чөлөөлөхөөр тусгажээ.

Хуулийн төслийн танилцуулгийг УИХ-ын гишүүн Н.Амарзаяа танилцууллаа.

Хөгжлийн банкны зээлийн санхүүжилтээр хэрэгжүүлж байгаа 1.5 сая тонн газрын тос боловсруулах хүчин чадалтай үйлдвэрийн төслийн нийт төсөвт өртгөөс хэмнэсэн хөрөнгөөр газрын тосны үйлдвэрийн ажилчдын хотхоны бүтээн байгуулалтыг санхүүжүүлэх юм. “Газрын тос боловсруулах үйлдвэр барих төслийн талаар авах зарим арга хэмжээний тухай” Монгол Улсын Засгийн газрын 2019 оны дөрөв дүгээр сарын 3-ны 129 дүгээр тогтоолоор хотхоны бүтээн байгуулалтын санхүүжилтийг шийдвэрлэсэн бөгөөд шаардлагатай бараа материал, тоног төхөөрөмжийг татвараас чөлөөлөхөөр хуулийн төслийг боловсруулсан байна.

Дорноговь аймгийн Сайншанд суманд барих 550 айлын орон сууц бүхий газрын тос боловсруулах үйлдвэрийн ажилчдын хотхоны төсөлд шаардагдах арматур, цемент, тоосго гэх мэт барилгын материалыг дотоодын аж ахуйн нэгжээс худалдан авах юм. Түүнчлэн хотхоны бүтээн байгуулалтад шаардлагатай импортоор оруулах бараа материалыг НӨАТ-аас чөлөөлөх тухай зохицуулалтыг хуулийн төсөлд боловсруулсан байна. УИХ-ын Төсвийн байнгын хорооны өчигдрийн хуралдаанаар, хуулийн төслийн дагаж мөрдөх хугацааг "Батлагдсан өдрөөс" гэснийг "2020 оны нэгдүгээр сарын 1-нээс" гэж өөрчлөх зарчмын зөрүүтэй санал гарчээ.

Хуулийн төслийн дагаж мөрдөх хугацааг "Батлагдсан өдрөөс" гэснийг "2020 оны нэгдүгээр сарын 1-нээс" гэж өөрчлөх Байнгын хорооны зарчмын зөрүүтэй саналыг гишүүдийн олонх дэмжсэнгүй. Иймд УИХ-ын дарга Г.Занданшатар эцсийн хэлэлцүүлэгт дээрх асуудлыг дахин хэлэлцэх чиглэл өгч, Төсвийн байнгын хороонд шилжүүллээ.