УИХ-ын чуулганы өнөөдрийн /2020.10.23/ нэгдсэн хуралдаанаар Засгийн газраас 2019 оны 05 дугаар сарын 03-ны өдөр УИХ-д өргөн мэдүүлсэн "Эм, эмнэлгийн хэрэглэгдэхүүний тухай хуулийн шинэчилсэн найруулга"-ын төслийн үзэл баримтлалын хувьд хэлэлцэх эсэхийг  хэлэлцлээ. 

Хуулийн төсөлтэй холбогдуулан УИХ-ын гишүүд асуулт асууж, санал хэллээ. 

УИХ-ын гишүүн Ц.Даваасүрэн:

• Иргэдийг цочроосон асуудал байна. 2013 онд Дэлхийн эрүүл мэндийн байгууллага судалгаа хийгээд манай эм бол дэлхийн зах зээлийн үнээс 5-6 дахин өндөр, гурван эмний нэг нь хуурамч гэдэг бол аюултай мэдээлэл юм. Агентлаг байгуулах гэснийхээ төлөө энэ мэдээллийг цацчих шиг боллоо. Гаднаас эм авах гэхээр та нарын хэлсэн шиг 5-6 дахин хямдхан биш манай эмнээс ч үнэтэй байгаад байна. Энэ тал дээр мэргэжлийн байгууллагын дагуу хэлж, судалгааг нь бидэнд өгөх хэрэгтэй байна.

• Эмийн бүртгэлийн асуудал байна. Эмийг туршиж гаргадаг. Өвчтөнд  турших нь тухайн улс орондоо хялбар байдаг. Туршихийн тулд янз бүрийн настай эрүүл хүмүүс дээр үзээд эмийн дүгнэлт гарах ёстой. Тэр нь хориотой байдаг учраас Монгол мэтийн жижиг буурай улс дээр туршаад байдаг.  Хэрэглээний явцад шинээр нэвтэрч байгаа эмэнд хяналт тавих тал дээр сул байна. Бүртгэж байгаа эмэнд туршилтийн хугацаа гэж өгч болохгүй юу? Гадаадад хэрэглэдэг юм байна гээд шууд хэрэглээд байх уу?