Хөгжлөөрөө тэргүүлэгч улс орны нэг БНСУ 1961-1996 оны хооронд үсрэнгүй хөгжиж чадсан бөгөөд энэхүү хөгжлийг Хан мөрний гайхамшиг гэж нэрлэдэг билээ. Үүнд тухайн улсын санхүүгийн болон татварын тааламжтай бодлогын үр дүн нөлөөлж,  Самсунг, Хёндэ, Эл Жи, Эс Кэй зэрэг хувийн (гэр бүлийн) компаниуд нь цэцэглэн хөгжсөн түүхтэй. Өнөөдөр тус улсын эдийн засаг дэлхийд эхний 10-т эрэмбэлэгддэг. Энэхүү амжилтад хүрэхэд Өмнөд Солонгосын тэргүүлэгч компаниудын нэг Самсунг корпорацын үүрэг оролцоо их бий. 82 охин компаниас бүрдэх Самсунг корпорацын жилийн орлого нь 500-600 тэрбум доллар, улсынхаа ДНБ-ны 25 хувийг бүрдүүлдэг.

Миний хувьд Самсунг корпорацын Стратеги төлөвлөлтийн ахлах менежерээр ажилладаг бөгөөд олон улсын төлбөрийн болон төлбөрийн бус дижитал түрийвчний глобал хамтын ажиллагаа болон томоохон стратегийн төслүүдийг хариуцдаг. Дэлхийд тэргүүлэгч “Samsung Electronics” компанид нь ажилладаг. Самсунг нь брэндийн хүч чадлаараа дэлхийд тавд,  санах ойн хагас дамжуулагч, TVs болон ухаалаг утасны зах зээлд дэлхийд тэргүүлдэг. 

Энэ том корпорацын нэг эд эс нь болж ажиллаж байгаадаа маш хүндэтгэлтэй хандаж, дэлхийд үнэлэгдсэн удирдагчид, орон, орны тэргүүлэх залуусаас олон зүйлийг сурч, салбар, салбарын төсөл дээр ажиллаж туршлага хуримтлуулж байна.Тухайлбал, технологийн дэвшлийг санхүүгийн үйлчилгээнүүдтэй хослуулан, тэдгээрийг хурдан шуурхай, амар хялбар, илүү хүртээмжтэй болгохоор финтек /Fintech/  салбар хөгжиж, технологийн компаниуд банк санхүүгийн байгууллага болж буй өнөө үед ийм сонирхолтой төсөл дээр ажиллах боломж гардаг. Самсунг өөрөө глобал компани, иймд АНУ, Энэтхэг …гэх мэт тодорхой улс руу зарим төсөл чиглэгдэж, хэрэгждэг учир өөр, өөр улс орон руу очих ажлын шаардлага гарч, үүнээс их зүйлийг сурдаг юм.

Би өөрөө төслийн удирдагч, манай багт олон улсын хөрөнгө оруулалтын болон зөвлөх компанид 5-6 жил ажилласан туршлагатай залуучуудад ажиллах эрх нь нээгддэг. Ийм чадварлаг залуусыг удирддаг хүний хувьд өөрөө хурцлагдаж, суралцаж, туршлагажиж, жилдээ 250 тэрбум долларын борлуулалтай ажилладаг том кампанийг удирдаж буй захиралдаа санал, бодлоо  товч, тодорхой танилцуулах зэрэг манлайлах чадварт алхам, алхмаар суралцаж өсөж, хөгжиж байгаадаа талархалтай ханддаг.

Хамгийн гол нь шинэ төсөл эхлүүлэхдээ, төгсгөлийн бариаг нь харж, бүх зүйлийг тооцоолон, үүсэж болзошгүй асуудлыг түрүүлж харж, шийдлийг удирдагчдаа танилцуулах стратегит суралцаж байгаа нь миний хувьд том алхам. Мөн багийнхаа гишүүн нэг бүрийг  ажиллах арга барил,  ур чадварт нь тохируулан удирдахад өдөр бүр суралцаж байна. Орчин үеийн мэдээлэл технологийн хөгжил шинэ зууны залуучууд бидэнд хүн төрөлхтний хөгжлийн хязгааргүй өрсөлдөөнд ижил тэгш гараанаас хүч үзэх боломжийг нээж өгсөн нь маш том давуу тал.

Дэлхийн өнцөг булан бүрд Монгол залуус, Монгол оюун ухаан, Монгол ур чадвараараа дэлхийд танигдаж, дэлхийн хэмжээнд үнэлэгдэх том компанид ажиллаж, туршлага хуримтлуулж, сурсан мэдсэн зүйлээ монголчууддаа хуваалцаж баялаг бүтээгчдээ дэмжсээр байна. 

Миний хувьд ч Самсунг корпорацад ажиллаж байхдаа эх орныхоо хөгжилд хувь нэмэр оруулах боломжтой гэж хардаг. Тухайлбал монголынхоо хөгжиж буй 2-3 технологийн компани ТУЗ-ын гишүүнээр ажиллаж, зөвлөх үйлчилгээ үзүүлдэг. Самсунг компани олон шинэ төслөө хаана, ямар улсад  эхлүүлэх талаар төлөвлөдөг, мөн хөрөнгө оруулалтын том багтай. Эх орныхоо хөгжиж буй итгэж болох технологийн компанид энэ боломжийг олгоход нь тусалж, Самсунгын үйл ажиллагааг монголдоо оруулж ирэн, идэвхжүүлэх алсын хараатай ажиллаж байна.  

Түүнчлэн Олон улсын төлбөрийн болон төлбөрийн бус дижитал түрийвчний глобал хамтын ажиллагаа болон томоохон стратегийн төслүүдийг хариуцан ажиллаж, туршлага хуримтлуулж буй залуу хүний хувьд монголынхоо төлбөрийн хамаарлыг бууруулахад хувь нэмрээ оруулж, энэ салбарт шинэчлэл хийж ажиллах хүсэл сонирхолтой. Дэлхийн улс орнуудын хөгжлийн үрийг эх орондоо түгээж, усалж, ургуулах хүндтэй үүргийг хүлээсэн залуучууд бидний хувьд эх орныхоо хөгжилд байгаа байгаа газраасаа ийнхүү хувь нэмэр оруулсаар байна.

Сэтгүүлч

Сэтгүүлч Ц.Соёлмаа soyolmaa@vip76.mn