Дэлхий нийтэд хуурамч эмийн асуудал “ Аюулын харанга” дэлдэж байгааг НҮБ-аас мэдээлж, үүний эсрэг арга хэмжээг зохион байгуулсаар байна.

Манай улсад ч энэ асуудал бодитоор нүүрэлснийг олон жишээнээс бэлхнээ харж болно. Тухайлбал энгийн ханиаданд хамаг мөнгө, санхүүгээ үрдэг, янз бүрийн үнэтэй олон эм авч хэрэглээд үр дүн гардаггүй, эцэст нь хүндэрдэг. Үүнийг захын хүн хэлнэ.

Эм гэдэг үндэсний аюулгүй байдалтай холбоотой стратегийн бүтээгдэхүүн. Ний нуугүй хэлэхэд бид сүүлийн 30 жилийн хугацаанд энэ асуудлыг хувийн хэвшилд даатгаад орхисон. Төрийн ямар ч оролцоогүй, хяналтгүй, зохицуулалтгүй явж ирсэн. Үүнийг засах ёстой.

Эрүүл мэндийн сайд С.Чинзориг, УИХ-ын чуулганаар хэлэлцэж байгаа Төрийн болон орон нутгийн өмчийн хөрөнгөөр бараа, ажил, үйлчилгээ худалдан авах тухай хуульд зарчмын зөрүүтэй санал оруулсан. Тэрээр эмийн худалдан авалтад чанар ба үнийг хосолмол шалгуурыг оруулж өгснөөр эмийн чанар бас үнэ дээр эргэлт гарна гэж үзэж байгаа бөгөөд энэ хуулийн 36.1.2-т худалдан авалтын цоо шинэ арга буюу олон улсын байгууллагын худалдан авалтыг ашиглах тухай оруулж өглөө.

• Ингэснээр эм, эмнэлгийн хэрэгслийг үйлдвэрлэгчээс болон олон улсын байгууллагаас шууд худалдан авах эрхийг нээж өгөх .
• Эмийн чанарыг тогтоохдоо нэгдүгээрт, ДЭМБ-ын баталгаажуулалтад орсон эсэхийг харна. Хэрэв энэ байгууллага баталгаажуулсан бол үнэлгээ өндөр байна.
• Хатуу зохицуулалттай орнууд буюу Европын үйлдвэрлэгчдээс авч байгаа, эрх бүхий байгууллагын гэрчилгээтэй бол чанарын өндөр үнэлгээ авна.

Үр дүнд нь иргэд чанартай, сайн эм хэрэглэх боломжтой болно.

Сэтгүүлч

Сэтгүүлч Ц.Соёлмаа soyolmaa@vip76.mn