Өнөөдөр /2018.11.01/ УИХ-ын нэгдсэн чуулганаар Төрөөс мөнгөний бодлогын талаар 2019 онд баримтлах үндсэн чиглэлийн анхны хэлэлцүүлгийг хийв.

Хуулийн төслийг Монголбанкнаас 2018 09 сарын 25-нд өргөн мэдүүлсэн бөгөөд УИХ-ын нэгдсэн чуулганы хэлэлцүүлэгт бэлтгэх Эдийн засгийн байнгын хорооны ажлын хэсгийн ахлагчаар УИХ-ын гишүүн Б.Баттөмөр ажиллаж байна.

Анхны хэлэлцүүлгийг хийсэн Эдийн засгийн байнгын хорооны санал дүгнэлтийг УИХ-ын гишүүн Б.Баттөмөр танилцууллаа.

Ажлын хэсэг 2, дэд ажлын хэсэг 3 удаа хуралдахдаа Монголбанк, Сангийн яам төсөл дэх бодлогын талаарх төсөөлөл, эрсдлийг хэрхэн тооцсон талаар болон бодлогын бусад баримт бичигтэй уялдуулсан эсэхтэй танилцсан байна. Мөн УИХ-ын гишүүд, холбогдох бусад байгууллагаас ирүүлсэн саналуудтай нэгбүрчлэн танилцаж, зарчмын зөрүүтэй саналын томьёоллуудыг нэгтгэжээ.

Байнгын хорооны санал дүгнэлттэй холбогдуулан УИХ-ын гишүүн Т.Аюурсайхан, О.Баасанхүү, Ё.Баатарбилэг, Х.Баделхан, Б.Бат-Эрдэнэ, М.Билэгт, Ц.Даваасүрэн, Н.Оюундарь, С.Чинзориг нар асуулт асууж хариулт авлаа.

Ийнхүү байнгын хорооноос гаргасан зарчмын томъёолол тус бүрээр санал хураалт явуулсны дараа хуулийн төслийг эцсийн хэлэлцүүлэгт бэлтгүүлэхээр Эдийн засгийн байнгын хороонд шилжүүлэв.

Төрөөс мөнгөний бодлогын талаар 2019 онд баримтлах үндсэн чиглэлийн анхны хэлэлцүүлгийг хийлээ